SHBA/ Të vdekurit nga Covid-19, i kalojnë ato të sulmeve terroriste të 11 Shtatorit 2001
E hëna ishte dita më vdekjeprurëse në SHBA, përsa i përket numrit të njerëzve që gjetën vdekjen për shkak të koronvirusit:541 viktima, ndërsa numri i përgjithshëm e tejkaloi shifrën 3.000. Përhapja e virusit të COVID-19, është tashmë zyrtarisht më vdekjeprurëse sesa sulmet terroriste të 11 shtatorit 2001 që vranë 2.977 njerëz.
Por numri i të vdekurve, pritet të rritet edhe më shumë përgjatë javëve në vazhdim. Shkolla e Mjekësisë e Universitetit të Uashingtonit, parashikon se vdekjet do të arrijnë në më shumë se 2.000 në ditë, duke nisur nga data 10 prill dhe duke vazhduar deri më 21 prill.
Sipas përllogarritjeve, deri në 4 gusht numri i njerëzve që do të gjejnë vdekjen nga përhapja e pandemisë në Shtetet e Bashkuara, mund të shkojë në 82.114. Rastet e raportuara arritën në më shumë se 163.000 të hënën, pasi numri i të infektuarve u shtua me të paktën 20.000 raste brenda një dite.
SHBA-ja ka aktualisht numrin më të madh të rasteve të konfirmuara në të gjithë botën. Por ky numër ka shumë gjasa të shtohet, pasi atje testet për koronavirusin po bëhen gjithnjë më të shpeshta. Gjatë një konference për shtyp nga Shtëpia e Bardhë, presidenti Donald Tramp deklaroi se më shumë se 1 milionë amerikanë janë testuar deri tani për koronavirusin, ose më pak se 0.3 për qind e popullsisë.
Zyrtarët e shëndetësisë, u kanë kërkuar amerikanëve të ndjekin udhëzimet dhe të qëndrojnë në shtëpi deri në fund të prillit, për të ngadalësuar përhapjen e koronavirusit, që e ka origjinën në Kinë, dhe që ka infektuar deri tani zyrtarisht mbi treçerek milionë njerëz në gjithë botën.
“Nëse të gjithë bashkë sillemi si duhet, mund të mbërrijmë shifrat nga 100-200 mijë viktima”- u shpreh për telvizionin “NBC” dr.Deborah Birks, koordinatore në Shtëpinë e Bardhë për menaxhimin e situatës së koronavirusit. Por, sipas përllogaritjeve numri i të vdekurve në ditë, do të bjerë nën 100 pas datës 9 qershor.
Deri në korrik disa njerëz mund të vazhdojnë të vdesin nga koronvirusi. Ndonëse rastet fatale duhet të jenë nën nivelin e epidemisë prej 10 persona në ditë, deri në javën e parë të korrikut.
Dr.Entoni Fauçi, kreu i Institutit Kombëtar të Alergjisë dhe Sëmundjeve Infektive, tha në konferencën e mbajtur në Shtëpinë e Bardhë, që ai pret një valë të re epidemike të koronavirusit
edhe në vjeshtë. Por ai shtoi se SHBA do të jetë deri atëherë më e përgatitur për të reaguar.
Por për momentin, më e keqja pritet që të vijë. Analiza parashikon një kaos në spitale në javën e dytë të prillit, kur do të mbërrijë piku i parë, ndonëse në disa shtete kulmi mund të vijë më vonë. Në rast se respektohen masat e distancimit social, numri i vdekjeve nga koronavirusi parashikohet të arrijë në 82.000 gjatë 4 muajve të ardhshëm. Të hënën, 225 milionë njerëz në SHBA ishin të izoluar. Numri i të vdekurve në Nju Jork, pritet të arrijë kulmin brenda 7-10 ditësh, thotë Farzad Mostashari, themeluesi i shoqatës së punonjësve të kujdesit shëndetësor “Aledade”.
Edhe zyrtarët e shtetit, presin që numri i vdekjeve në Nju Jork të vazhdojë të rritet. “Ne kemi humbur tashmë mbi 1 mijë njujorkezë. Për mua, tashmë jemi përtej çdo lloj skenari të pritshëm”-thotë guvernatori i Nju Jorkut, Endrju Kuomo.
Ai shtoi se rritja e numrit të të infektuarve të rinj me koronavirus duket se po ngadalësohet, ndërsa numri i atyre që shtrohen dhe dalin nga spitali po shtohet. “Njerëzit vijnë në spital, qëndrojnë disa ditë, dhe më pas shkojnë në shtëpitë e tyre”-thotë Kuomo.
Guvernatori tha se mund të detyrohet të mbyllë çdo shesh lojërash, në mënyrë që të zbatohet rregulli i distancimit social, dhe të ngadalësohet përhapja e virusit. Për të lehtësuar presionin, në Nju Jork ka nisur ndërtimi i një spitali fushor në Parkun Qendror të Manhatanit.
Tendat e bardha aty të ngjallin ndjenjën e kohës së luftës në një ishull plot gjelbërim, që përdoret zakonisht nga njujorkezët për të vrapuar, pikniqe, dhe për të shijuar ditët e para të pranverës.
Kuomo dhe kryebashkiakaku Bill de Blazio, e kanë kritikuar tashmë trajtimin e kësaj krizës nga presidenti Trump, për shkak të mungesës së dukshme të ventilatorëve dhe pajisjeve mbrojtëse personale. Por të hënën, Trump akuzoi personelin mjekësor se po vidhte fshehurazi maskat që janë tashmë në dispozicion.
Ndërkohë kompania e njohur “Ford Motor Co”, konfirmoi po të hënën se do të prodhojë 50.000 ventilatorë gjatë 100 ditëve të ardhshme në një fabrikë të sajën në Miçigan, në bashkëpunim me njësinë e kujdesit shëndetësor të kompanisë tjetër të madhe amerikane “General Electric”, dhe më vonë mund të prodhojë deri në 30.000 ventilatorë në muaj.
Të premten e shkuar, Trump tha se do t’i referohej kompetencave të Aktit të Prodhimit të Mbrojtjes, për t’i detyruar kompanitë e mëdha prodhuese në SHBA, të prodhojnë sa më shumë ventilatorë. /S.T/ Fjala.al
