Shtetet e Bashkuara të Amerikës kanë blerë plot 30 milionë doza të ilaçit kundër malaries, ndonëse shkencërisht nuk është vërtetuar ende efekti i tyre ndaj koronavirusit.
Presidenti i Amerikës, Donald Trump, tha se SHBA-të kanë blerë pothuajse 30 milionë doza hidroksilklorinë për trajtimin e COVID-19, po ashtu ai vazhdon ta reklamojë ilaçin, megjithë paralajmërimet e ekspertit të tij të lartë shëndetësor se provat për ilaçin nuk janë të provuara.
Disa vende po zgjerojnë mundësinë e përdorimit të hidroksiklorinës për të trajtuar COVID-19, përfshirë këtu edhe Shtetet e Bashkuara.
“Kemi blerë një sasi masive prej 29 milionë dozash. Ato po vijnë nga të gjithë laboratorët, tani po e prodhojmë këtu, pasi në rast se funksionon, ne duam ta kemi”,-tha Trump.
Hidroksiklorokina, e njohur ndryshe me emrin kikina, përdoret për të trajtuar malarien, lupusin dhe artritin dhe ndonëse përfitimet ndaj këtij ilaçi nuk janë vërtetuar ende, që nga shkurti presidenti Trump po e trumbeton atë me zell të jashtëzakonshëm.
“Unë mund ta marr. Më duhet të marr lejen e mjekut tim për këtë, por mund ta marr”-deklaroi ai.
Trump ka shtuar gjithashtu se vendet me shkallë të lartë të malaries kanë një numër të ulët të COVID-19, dhe se njerëzit me lupus nuk janë aq të prekur nga koronavirusi.
Sipas ish-zëvendësndihmës sekretarit të shëndetësisë, Anand Parekh, ky është vetëm një suposim.
“Derisa të shohim të dhëna dhe prova, nuk duhet të nxitojmë në ndonjë përfundim. Arsyeja më e mundshme, për shembull, përse vendet në Afrikë nuk po raportojnë një numër të lartë të rasteve është thjesht sepse testimi ka munguar në ato vende”-deklaroi ai.
Duhet theksuar se spitalet në SHBA u kanë dhënë hidroksiklorinë pacientëve me koronavirus, duke arsyetuar se është relativisht i sigurt dhe ka të ngjarë të mos shkaktojë dëme. Ky medikament nuk konsiderohet i sigurt për njerëzit me ritme jo të rregullta të zemrës./Fjala.al/
