Në urgjencën e Spitalit të Lezhës ka patur një protestë disa minutëshe për shkak të mashtrimit që, sipas mjekëve, është bërë me shpërblimet. Në një komunikim nga urgjenca, mjekët thanë se Qeveria u kishte premtuar fillimisht një shpërblim prej 1000 euro për përballjen me koronavirusin, më pas shifra zbriti në 500 euro dhe në fund fare u është dhënë vetëm 5 mijë lekë (të reja).
Në shenjë pakënaqësie, stafi i mjekëve, infermiereve, sanitareve dhe shoferëve të Repartit të Urgjencës kanë bërë me dije se do të refuzojnë shpërblimin për muajin mars, por nga ana tjetër do të vazhdojnë punën me të njëjtin përkushtim si ditën e parë, për t’u ardhur në ndihmë qytetarëve.
Ata kërkuan që ky shpërblim t’u jepet familjeve në nevojë.
Lezha ka qenë një nga qytetet ku ka patur një numër të konsiderueshëm të infektuarish me COVID-19 të infermierëve dhe stafit të spitalit.
