Përkeqësimi i gjendjes shëndetësore të kryeministrit të Mbretërisë së Bashkuar, Boris Johnson, ka bërë që ditën e sotme në mediat britanike të qarkullojnë lajme për situatën politike dhe të ngrihen pikëpyetje për valixhen bërthamore.
Deri në këto momente qeveria britanike nuk ka treguar se kush është përgjegjës për raketat bërthamore në Mbretërinë e Bashkuar gjatë qëndrimit në spital të Johnson.
Ministri i Kabinetit Michael Gove i është përgjigjur intervistuesit të BBC-së për pyetjen se nëse kodet bërthamore ishin kaluar Ministrit të Jashtëm, Dominic Raab, duke i thënë se janë zbatuar protokollet, por nuk kka dhënë më tej detaje.
“Janë zbatuar protokollet e testuara mirë. Por unë nuk mund të flas për çështje të sigurisë kombëtare”.-tha Gove.
Duhet theksuar se Mbretëria e Bashkuar është një nga pesë fuqitë bërthamore zyrtare dhe ka katër nëndetëse bërthamore të armatosura me raketa balistike Trident me koka bërthamore. Ky vend ka afro 215 raketa bërthamore, por vetëm 120 besohet të jenë operative, shkruan Reuters. Deri në këto momente vetëm Kryeministri ka kodet që lejojnë urdhërimin e një sulmi bërthamor, ose të paktën kështu është konfirmuar./Fjala.al/
