Fantazmat” të mbështjella me çarçafë të bardhë, po bredhin në rrugët e një qyteze në provincën qendrore të Javas në Indonezi, në përpjekje për t’i frikësuar njerëzit dhe bindur ata të qëndrojnë në shtëpi gjatë pandemisë së koronavirusit.
“Pocong” ose “pochong”, është një fantazmë e njohur në folklorin vendas që endet nëpër varreza, i veshur nga koka deri tek këmbët me qefinin e një të vdekuri. Vullnetarët në fshatin Kepuh në Sukoharjo i thanë agjencisë Rojter se po patrullojnë në rrugë prej disa ditësh.
Në fillim kjo ide u ndalua kur u bë një sensacion në mediat sociale, dhe kur pati një rritje të numrit të njerëzve që dilnin enkas nga shtëpitë e tyre për të parë fantazmat.
“Së pari, ne duam që të jemi të ndryshëm. Së dyti, dëshirojmë të krijojmë një efekt parandalues sepse ‘Pocong’ është drithërues dhe i frikshëm”- tha kreu i grupit vullnetar të të rinjve, Anjar Pancaningtyas, duke shtuar se nisma ishte në bashkëpunim edhe me policinë lokale.
“Që kur e kemi nisur këtë fushatë, njerëzit janë bërë më të bindur ndaj idesë së qëndrimit brenda”-shtoi ai. “Fantazmat” nuk janë dhe aq të shkathëta, dhe duhet të kërcejnë si lepujt, pasi duart dhe këmbët e tyre janë të lidhura brenda qefinit.
Presidenti indonezian Joko Vidodo e shpalli një ditë më parë pandeminë e koronavirusit një fatkeqësi kombëtare. Ai shpalli gjendjen e emergjencës që më 31 mars, me Ministrinë e Shëndetësisë që po përpiqet të zbatojë masa e distancimit social, dhe ndalojë hyrjen në
vend të shtetasve të huaj.
Por Vidodo ka shmangur futjen e vendit në një bllokim të plotë kombëtar. Indonezia ka raportuar deri tani 4557 raste dhe 399 të vdekur, niveli më i lartë i vdekshmërisë në Azinë Lindore, përveç Kinës. “Banorët nuk dinë ende se si të frenojnë përhapjen e sëmundjes Covid-19. Ata duan të jetojnë normalisht, ndaj për ta është shumë e vështirë që të zbatojnë udhëzimin për të qënduar mbyllur në shtëpi”- tha për Rojter kreu i fshatit Kepuh, Prijadi.
Dhe rreziqet nga virusi mund të rriten me afrimin e Muajit të Ramazanit. Studiuesit në Universitetin e Indonezisë, kanë parashikuar se nëse deri në maj nuk merren masa të ashpra kufizuese, vetëm në këtë vend mund të ketë deri në 140.000 të vdekur, dhe 1.5 milionë të prekur nga Covid-19./ S.T/ Fjala.al
