Ministria e Infrastrukturës dhe Energjisë ka bërë publike kalendarin e fluturimeve që do të kryhen këtë javë, në kuadër të nisjes së procesit të riatdhesimit për shtetasit shqiptarë që duan të kthehen në Shqipëri.
Në njoftimin e ministrisë bëhet me dije se në datat 18 dhe 19 prill do të jenë udhëtimet e para. Në datën 18 do të kryhet udhëtimi Stamboll-Tiranë, më pas Tiranë-Romë dhe Romë-Tiranë. Më tej shtohet se në datën 19, sipas njoftimit të Ministrisë së Infrastrukturës dhe Energjisë, do të kryhen fluturimet Tiranë-Milano dhe Milano-Tiranë.
Të gjithë shqiptarët që dëshirojnë të kthehen, duhet që më parë të bëjnë rezervimin e hotelit, të vendosura në dispozicion, ku do të karantinohen për 14 ditë pas mbërritjes në Shqipëri, së bashku me pagesën dhe më pas të bëjnë rezervimin e biletës. Kjoo procedurë mund të bëhet përmes aksesimit të faqes së kompanisë Air Albania, ku duhet të ndjekin hapat e parashikuara.
Ndërsa në ditët në vazhdim, janë parashikuar fluturime riatdhesimi edhe nga Bari, Frankfurit, Parisi dhe Londra, ndërkohë që burime nga Ministria e Infrastrukturës dhe Energjisë, bëjnë me dije se në varësi të kërkesave të qytetarëve do të vlerësohet edhe nëse do të ketë apo jo udhëtime nga destiancione të tjera.
