Kryeministri Edi Rama ka prezantuar nismën e re për amnistinë fiskale. Rama bëri me dije se qytetarët që kanë të ardhura të padeklaruara nga emigracioni apo ato kompani që kanë nevojë të formalizojnë paratë, do e bëjnë pa u penalizuar.
“Një amnisti fiskale e domosdoshme, pasi për 30 vite me radhë qindra mijëra qytetarë në emigracion kanë plot kursime që i kanë të pamundur t’i depozitojnë në banka. Gjithashtu edhe kompanitë që kanë të ardhura të padeklaruara. Do të jetë një amnisti që do të ndihmojë në lehtësimin e atyre që jetojnë në emigracion dhe atyre që jetojnë në vendin tonë, duke qenë në nevojën 30 vjeçare për të formalizuar paranë”, tha Rama.
Por ka shumë kategori që nuk do të mund të përfitojnë nga amnistia. Kreu i qeverisë tha se politikanët, gjyqtarët dhe policët do të përjashtohen nga kjo aministi.
Amnistia fiskale do të jetë 1 vjeçare dhe Rama tha se pret që Parlamenti ta miratojë të paktën në muajin maj.
