Ka ndërruar jetë në moshën 77- vjeçare në shtëpinë e tij në Tiranë aktori dhe regjisori i njohur Rikard Ljarja.
Artisti i njohur i filmit vuante prej kohësh nga një sëmundje e rëndë.
Kush është Rikard Ljarja
Rikard Ljarja lindi më 1 prill 1943 në Shkodër. Ai do të shkëlqente si një nga aktorët më të mëdhenj të teatrit dhe kinematografisë shqiptare.
Në vitin 1960 mbaroi maturën në Shkodër kurse në vitin 1965 u diplomua në Shkollën e Lartë të Aktrimit “A. Moisiu”, Tiranë.
Për tetë vite, pas diplomimit, punoi aktor i teatrit në Teatrin “Migjeni” në Shkodër. Prej vitit 1973 deri në vitin 1996 ai ishte aktor, skenarist dhe regjisor i filmave të prodhuar nga Kinostudio.
Prej 1996 deri 2002, kur doli në pension, ka qenë drejtor artistik në televizionin publik.
Filmat ku ka interpretuar
Ljarja ka interpretuar në filmat: Pesha e kohës – (1988), ku luante rolin e Vasilit; Radiostacioni – (1979); Komisari i dritës – (1966) apo Rrugë të bardha – (1974) ku luajti rolin që e identifikoi për publikun shqiptarë, atë të elektricistit Dedë. Filmi që i dha peshën më të madhe ka qenë “Në pyjet me borë ka jetë”, ku edhe u njoh me bashkëshorten e tij, aktoren Marjetën.
Ikje në kohën e koronavirusit
Rikard Ljarja është ikona e dytë e artit shqiptar që ikën nga kjo botë pas asaj të aktorit të humorit Gëzim Kruja.
Vdekja e Ljarjas bëhet edhe më e dhimbshme në këto kohë të krijuara nga koronavirusi në Shqipëri, pasi ai nuk do të mund të përcillet me nderimet e duhura, ashtu siç ndodhi me aktorin Gëzim Kruja.
