Komisioni i Ligjeve ka miratuar sot shtyrjen e gjendjes së Fatkeqësisë Natyrore deri më 23 qershor.
Gjatë mbledhjes së zhvilluar on-line ditën e sotme, dy deputetët e opozitës Alban Zeneli dhe Andi Përmeti abstenuan dhe ky i fundit tha se nuk është kundër shtyrjes së Fatkeqësisë, por kërkoi më shumë argumente për këtë vendim.
Ndërsa në përgjigje të kërkesës së deputetit Përmeti, zv. ministrja e Shëndetësisë, Mira Rakacoli tha se është e nevojshme kjo kohëzgjatje për shkak se specialistët kanë parashikuar që të ketë një rritje të të infektuarve gjatë 14 ditëve si pasojë e masave lehtësuese.
Rakacolli tha se është e nevojshme që të vijojë gjendja e Fatkeqësisë Natyrore, në rast se do të jetë e domosdoshme për të bërë hapa pas më të rrepta.
“Ka ardhur momenti që të gjykojmë që këto masa të lirohen, por duke qenë se e gjithë merita është pikërisht te këto masa. Nga lirimi i tyre specialistët presin që të ketë raste të shtuara duke qenë se një pjesë e të prekurve janë asimptomatik, prandaj këto masa do të jenë graduale. Duhet që të presim minimumi dy javë që të vlerësojmë nëse do ketë rritje ose jo, dhe nëse do ketë, që gjasat janë po, dhe që të kthehemi sërish aty. kjo do të na ndihmojë për të vazhduar që të kontrollojmë situatën. Është e domosdoshme që të vazhdojmë ta kontrollojmë”,-u shpreh ajo.
Ministri i rindërtimit, Arben Ahmetaj tha se ky vendim ndihmon në uljen kurbës së përhapjes se COVID-19 dhe shikohet si domosdoshëm.
“Duke qenë se jemi të gjithë te Komisioni juaj të përditësuar me situatën e gjendjes do të na ndihmojë ne që të kemi mundësi të kontrollojmë dhe të fusim në një kurbë ulëse përhapjen e infeksionit”,-tha Ahmetaj./Fjala.al/
