Shefi ekzekutiv i klubit të Monza-s dhe njëkohësisht ish-zëvendëspresidenti i Milan, Adriano Galliani, ka thënë se futbolli duhet të vazhdojë pavarësisht koronavirusit, pasi sipas tij nëse ndërpritet shumë klube rrezikojnë të falimentojnë.
Qeveria italiane është duke diskutuar për lehtësimin e masave të karantinës në Itali nga 4 maji, përfshirë këtu edhe lejimin e lojtarëve për t’u kthyer në stërvitje, por duke bërë teste për Covid-19 në baza ditore.
Sipas Gallianit borxhet e klubeve si dhe mungesa e të ardhurave të reja kanë për të shkaktuar një gjendje dramatike te futbolli italian.
“Vetëm virusi mund ta vendosë kohën. Është shumë e vështirë, sepse ne duhet patjetër të kthehemi një ditë në stërvitje dhe do të na duhen edhe katër javë të tjera për t’u përgatitur për të luajtur, prandaj nuk e di se kur mund të rifillojë liga. Ajo çfarë mund të them është se borxhet që disa klube i kanë dhe humbja e të hyrave do të shkaktojë gjendje dramatike. Disa klube italiane rrezikojnë të falimentojnë. Askush nuk është në gjendje t’i mbijetojë një pezullimi afatgjatë të futbollit”, u shpreh ai për “Telelombardia”./Fjala.al/
