“Test, test, test”! OBSH nxiti qeveritë në Botë që të përballeshin me sëmundjen Covid-19, duke synuar sa më shumë testime për ndërprerjen e zinxhirit të infektimit. Por, çfarë po ndodh në Shqipëri? Masat kryesore janë izolim dhe ndëshkim. Autoritetet deklarojnë se po bëjnë testime duke gjurmuar kontaktet e të infektuarëve, por në gazetën Fjala vjen denoncimi nga Kruja ku një çifti të moshuarish u refuzohet testi edhe pse kanë nusen e djalit pozitive me Covid-19.
Një qytetar shqiptar sot ka humbur lirinë e lëvizjes së lirë në territorin e vendit të tij. Që të dalësh nga shtëpia të duhet një leje e posaçme nga portali zyrtar shtetëror e-albania dhe mund të qëndrosh jashtë shtëpisë për pazare a ndonjë punë tjetër vetëm 1 orë e 30 minuta në ditë nga ora 5.00 deri në 17.30. Nuk mund të lëvizë nga qyteti në qytet dhe gjatë fundjavave nuk i lejohet të dalë fare nga shtëpia, vetëm në rast se ka autorizim që i duhet të punojë. Këto masa janë marrë për të parandaluar përhapjen e mëtejshme të pandemisësë sëmundjes ngjitëse Covid-19, nga e cila janë infektuar deri më tani 634 persona dhe kanë humbur jetën 27 të tjerë. Por masat e marra për shkak të pandemisë kanë edhe efekte penale për qytetarët që thyejnë karantinën me gjobëdhe deri 2 vite burg dhe 8 vite burg për atë që bëhet shkak për infektimin e personave të tjerë. Izolim dhe ndëshkim. Kjo është politika e shtetit shqiptar për të ndaluar përhapjen e mëtejshme të pandemisë, ndërsa vijon testimi i kufizuar i njerëzve që kërkojnë ndihmë tek numri i urgjencës 127. Drejtori i Organizatës Botërore e Shëndetësisë, Tedros Ad’hanom Gebrejesus, në mes të Marsit ngulmoi tek rëndësia e testimit. “Kemi porosi të thjeshtë për gjitha vendet: testoni, testoni, testoni”- tha ai.
Autoritetet shqiptare nuk kanë preferuar testim në masë edhe pse arsyeja nuk është thënë zyrtarisht. Dyshimi se kishte mungesë tamponësh nuk u pranua nga ministrja e Shëndetësisë, e cila edhe pse nuk dha një numër të saktë është shprehur në nisje të pandemisë se “kemi sasi të konsiderueshme tamponësh dhe vijojmë të furnizohemi në vazhdim”. Kjo ministri bën çdo ditë bilancet e testimeve dhe të infektuarëve, ku vihet re numri i vogël i testimeve, 6269 gjithsej. Strategjia zyrtare është hetimi epidemiologjik dhe gjurmimii kontaktevetëtë infektuarëve. Por, edhe testimi i kontakteve të afërta me një të infektuar mesa duket bëhet vetëm në rast se shfaqin shenja të sëmundjes. Në gazetën Fjala dje erdhi një denoncim nga Kruja, ku një çift të moshuarish kërkonin tu bëhej tamponi, pasi nusja e djalit të tyre që jetonte me ata kishte dalë pozitive me Covid-19. Çifti Xhafa deklaron se spitali rajonal refuzoi të kryente testin duke i pyetur nëse kanë apo jo simptoma. As të moshuarve Xhuma Xhafa, 74 vjeçe dhe Ahmet Xhafa 82 vjeç, dhe as nipit dhe mbesës së tyre, nuk u janë bërë tamponët edhe pse një pjesëtar i familjes është pozitiv.
Ekspertët e fushës sugjerojnë kudo në botë se testimi është dritarja e vetme për të parë se si po përhapet pandemia. Pa testuar nuk ka asnjë mënyrë për të kuptuar pandeminë dhe për të ngadalësuar përhapjen dhe ndikimin e virusit. Edhe në Shqipëri ka pasur ekspertë që kanë mbrojtur këtë strategji. Mjeku imunolog, Genc Sulçebe para pak ditësh këmbënguli se në fazën në të cilën ndodhet pandemia e koronavirusit, testimi masiv është mënyra më e mirë e frenimit të përhapjes së saj. Ndërsa jemi në javën e 7-të të izolimit, pandemia vijon të jetë me një kurbë të qëndrueshme duke shënuar çdo ditë të infektuar të rinj me një rritje në dy ditët e fundit dhe me përhapjen e vatrave të reja të infektimit./Fjala.al
-Denoncimi/ Dyshojnë se janë me Covid-19, spitali i Krujës refuzon t’u bëj tamponin
