Teksa komenton mbi debatin që ka ‘pushtuar’ Gjermaninë për kufizimin e lirive themelore të njeriut për shkak të koronavirusit, Wolfgang Schäuble e konsideron si “absolutisht të gabuar që të nënshtrohet gjithçka për ruajtjen e jetës njerëzore”.
Në një intervistë për Der Tagesspiegel, ai që konsiderohet një prej ‘baballarëve’ shumë të respektuar të politikës gjermane, përmendin nenin 1 të Kushtetutës se “dinjiteti i njerëzve është i paprekshëm”.
“Nëse ekziston një vlerë absolute e përcaktuar në Kushtetutën tonë, është dinjiteti i njerëzve, i cili është i paprekshëm. Por kjo nuk do të thotë se duhet të vdesim”, thotë Schäuble, kryetar i Bundestagut gjerman.
Sipas ish-ministrit të Financave, është shteti që duhet t’i sigurojë të gjithëve kujdesin më të mirë të mundshëm shëndetësor, “por për fat të keq njerëzit do të vazhdojnë të vdesin nga Covid-19”.
Ai paralajmëron edhe për një kundër-reagim të njerëzve ndaj masave të ashpra kufizuese: “Sa më gjatë të zgjasë, aq me e rëndë do të jetë”.
Schäuble thekson se dalja nga karantina do të jetë më e vështirë sesa hyrja në të. Kufizimet do të duhet të hiqen me kujdes dhe “hap pas hapi”, por vendimet “nuk mund të lihen plotësisht në duart e virologëve. Përkundrazi, të gjitha “implikimet ekonomike, sociale dhe psikologjike” do të duhet të merren parasysh. Pasojat e një bllokimi të zgjatur “do të ishin të frikshme”, shprehet ai.
Wolfgang Schäuble deklaron se shteti nuk mund të garantojë përgjithmonë atë që garanton qarkullimi normal i ekonomisë.
