Jupp Heynckes është një personazh që braktis menjëherë pensionin e majme dhe pushimet e qeta nëse te bayern e thërrasin në ndihmë. E bëri këtë kur bavarezëve u duhej një timonier në emergjencë, dhe e bën edhe kur duhet të këshillojë për futbollistë e rinj.
Së fundmi Jupp Heynckes, ka hedhur dyshime mbi blerjen potenciale të talentit të përfaqësueses gjermane Leroy Sane. Ky i fundit vazhdon të lidhet me një transferim të mundshëm te skuadra e Bayern Munich, me merkaton e verës që po afrohet. Mesfushori ofensiv i Manchester City është duke u rikuperuar nga një lëndim që e pësoi në fillim të sezonit, madje kjo bëri të dështojnë dhe tratativat në dimër. Jupp Heynckes, njeriu që e bëri Bayernin të shkëlqente disa vite më parë ka thënë se çmimi i tij është i pajustifikueshëm.
“Për mua, ai akoma nuk ka kaluar në nivelin e një top-lojtari absolut. Mendoj se është dikush në një udhëkryq dhe ende nuk ka vendosur se farë do të bëjë. A do të punojë ai për vete, apo do të mbetet vetëm një talent në pritje?”, ka shtuar trajneri gjerman.
“Leroy duhet të jetë gati për hapin tjetër të madh sepse nuk ka vlerë nëse përdor talentin vetëm kohë pas kohe dhe me oshilacione. Sinqerisht them se nuk e shoh aspak si të arsyeshëm çmimin e tij”, ka thënë ndër të tjerash Heynckes. Praktikisht në gjuhë direkte, veterani i stolit e quan menduri, që bayern të paguajë 120 milionë Euro për mesfushorin./ Fjala.al
