Presidenti Ilir Meta ka kujtuar sot 1-vjetorin e vdekjes në krye të detyrës të Major Klodian Tanushi dhe Zarife Hasanajt, të cilët ndodheshin në një misioni të NATO-s për çaktivizimin e bombave në Letoni.
Në një postim në “Facebook”, Meta shkruan se rënia e tyre në krye të detyrës është dëshmi e lavdishme e përkushtimit dhe sakrificës të Forcave tona të Armatosura në çdo angazhim dhe mision të NATO-s, në shërbim të qytetarëve dhe sigurisë së tyre.
Mesazhi i Ilir Metës:
Në një vjetorin e rënies në krye të detyrës gjatë misionit të NATO-s në Letoni, nderojmë sot me respekt dhe mirënjohje të thellë kujtimin, sakrificën sublime, kontributet e çmuara, patriotizmin, trimërinë dhe ndjenjën e lartë të përgjegjësisë të Dëshmorit të Atdheut, Major Klodian Tanushi dhe Dëshmores së Atdheut, Zarife Hasanaj.
Rënia e tyre në krye të detyrës, është dëshmi e lavdishme e përkushtimit dhe sakrificës të Forcave tona të Armatosura në çdo angazhim dhe mision të NATO-s, në shërbim të qytetarëve dhe sigurisë së tyre.
I përjetshëm kujtimi i tyre! ??
