-Politika post-Covid/ Kush humbi dhe kush fitoi nga epidemia?!
“Dhurata më e madhe që u bën natyra diktatorëve të vegjël janë fatkeqësitë natyrore. Ky dhe është apogjeu, maksimumi i Ramës”. Akademiku Apollon Baçe në analizë për gazetën” Fjala” thotë se epidemia e koronavirusit nxori në pah tragjikomedinë e politikës që kemi aktualisht dhe kjo nuk do të ndryshojë as pas kalimit të epidemisë.
Gjendjes së izolimit të jetës për shkak të epidemisë në vend duket se po i vjen fundi dhe politika pritet t’i rikthehet normalitetit. Madje, kryeministri Rama e ka “harruar” koronavirusin dhe ka nisur të inspektojë ndërtimet e rrugëve e stadiumeve. Si e mendoni skenën politike pas Covid-it?
Skena politike pas Covid-it? Ja, na u bë familjar, kovid, si kallash, dhe nuk e di si do të jetojmë pa të, veçanërisht komandantët e legjionit të nderit të koronavirusit.
Nuk ka pse ta përfytyroj pasi e di si do të ecet. Një déjà vu ku deri një ditë para zgjedhjeve, do të kërkohen zgjedhje të parakohshme. Do të kërkohen komisione ku palët do të arrijnë suksesin e jashtëzakonshëm (të përshëndetur së pari nga ambasada amerikane dhe e BE-së) të ndryshimit rrënjësor dhe thelbësor të asgjëje.
Çfarë fitoi e çfarë humbi Rama nga menaxhimi i situatës së epidemisë?
Raporti Koronavirus-Rama është një tragjikomedi. Në kuptimin tragjedi për njerëzit që humbën të afërmit, ndonëse jo e përmasave të gripit spanjoll, i cili, duke pasur parasysh se bota ishte 4 herë më pak e populluar, shënoi 750 herë më tepër viktima.
Një komedi e tipit Diktatori i Madh, i Çarli Çaplinit, ku piktori Adolf lumturohet që e ka përfund globin dhe luan me të.
Faktikisht, dhurata më e madhe që u bën natyra diktatorëve të vegjël janë fatkeqësitë natyrore. Ky dhe është apogjeu, maksimumi i Ramës, ku nxirrte autoblinda dhe mitraloza për të frikësuar popullin e tij, kur shfaqte policinë e Algjerisë afrikane duke rrahur turmat, kur njerëzit falënderonin perëndinë Amon Rama për rrezet e diellit. Një komedi ku njerëzit bridhnin nga ora 6 deri në orën 15 dhe në muzg liridalje kishte virusi.
Do vijë një ditë që njerëzore (jo delet e sotme) do qeshin me absurdin grotesk të Koronaramës.
Po opozita, a e shfrytëzoi këtë moment për të forcuar pozitat e saj, çfarë duhej të bënte ndryshe sipas jush?
Opozita? “Po zhduke Bashën, ke zhdukur dhe Ramën, se nuk ka ku të mbahet më”, tha shoferi i taksisë. Shumë më efikase janë fjalimet e Murrizit, pa llogaritur intervistat e Pekës.
Nuk e di sa do t’i ecë Bashës strategjia prej rrëqebulli: të qëndrojë mbi shkëmb, duke pritur t’i notojë para kufoma politike e Ramës. Nëse nuk arrin të krijohet një grupim i ri politik me së pari ekonomistë të mirëfilltë (ekraneve ka shumë të tillë) jo, pa flakur oligarkizmin dhe neoliberalizmin (sa komike, neoliberalizëm shqiptar), Shqipërinë e ka marrë lumi./ Fjala.al
-Skënder Minxhozi: Covid-i ka ridimensionuar jetën tonë, ekonomia mbetet primare
