Serbia është duke përdorur hapjen e kufijve pas pandemisë së koronavirusit si një provokim të drejtëpërdrejtë ndaj shtetësisë së Kosovës, dhe për këtë po përdor Shqipërinë.
Ministri i Jashtëm serb, Ivica Daçiç deklaroi sot se “nga 1 qershori Serbia do të rihapë kufijtë për shtetasit e Bosnje dhe Hercegovinës, Malit të Zi, Shqipërisë dhe Maqedonisë së Veriut”. Por Serbia dhe Shqipëria nuk kanë një kufi të përbashkët.
Propaganda serbe qëllimisht përdor Shqipërinë për të mos pranuar në asnjë moment kufijtë shtetëror të Republikës së Kosovës. Dhe kjo fushatë e Beogradit në këtë moment duket e mirë-koordinuar.
Edhe një ditë më parë, Qeveria e Serbisë deklaroi se “në kuadrin e lehtësimit të masave të koronavirusit do të hapë kufijtë për qytetarët e katër shteteve fqinjë, Shqipërisë, Bosnjë-Hercegovinës, Malit të Zi dhe Maqedonisë së Veriut”.
Pavarësisht provokimeve të njëpasnjëshme të Serbisë ndaj Kosovës, duke përdorur Shqipërinë, nga Tirana zyrtare nuk ka ende asnjë reagim.
