Më 16 maj do të rihapen plazhet në Greqi. Kështu njoftuan autoritetet, pas të dhënave për Covid-19 dhe atyre meteorologjike, duke përfshirë dhe rekomandimin e Komitetit të Sëmundjeve Infektive në Ministrinë greke të Shëndetësisë.
Bizneset në plazhe, që marrin çadra dielli dhe shezlonë me qira, do të hapen të shtunën nga ora 08:00, por nën disa masa sigurie.
Këtu përfshihet regjistrimi e numrit të pushuesve të pranishëm, maksimumi 40 persona për 1 000 metra katrorë, distancë prej katër merash ndërmjet çadrave dhe kufizime në numrin e shezlonëve për çadër, dy të tillë, përveç familjeve me fëmjë.
Pushuesit do të jenë të detyruar të shtrihen mbi peshqirë.
Konsumatorët duhet të mbajnë një distancë prej 1,5 metrash nga njëri- tjetri gjatë porositjes për ushqim ose pije. Gjithashtu janë të ndaluara të gjitha sportet e kontaktit në grup.
Nga ana e saj Policia greke (ELAS), sqaroi se patrullimi në rritje nuk do të thotë monitorim i publikut mbi kufizimet e koronavirusit.
Duke iu përgjigjur akuzave se policia do të monitorojë plazhet dhe sheshet gjatë fundjavës, zëdhënësi i ELAS, Theodoros Chronopoulos theksoi se prania e policisë lidhet vetëm me parandalimin dhe luftën e krimit, ndërsa respektimi i kufizimeve është përgjegjësi e publikut.
