Kreu i PD-së, Lulzim Basha, e ka cilësuar “vjedhjen më të dhunshme që i bëhet shqiptarëve” kalimin e Teatrit Kombëtar në pronësi të Bashkisë së Tiranës dhe vendimin për shembjen e kompleksit të godinave.
Përmes një postimi në rrjetin e tij social Facebook, ku ka shpërndarë edhe qëndrimin e organizatës “Evropa Nostra”, Basha shkruan se ky është “akt lufte ndaj shoqërisë dhe ekonomisë”.
“Afera me Teatrin Kombëtar është vjedhja më e dhunshme që u bëhet shqiptarëve nga Rama. Grabitja e TK në mes të pandemisë është akt lufte ndaj shoqërisë dhe ekonomisë që po rrënohen nga Ramavirusi: varfëri masive, krizë e thellë, papunësi e lartë, institucione të kapura dhe korrupsion rekord”, tha Basha, i cili kaloi natën me artistët dhe aktivistët në oborrin e Teatrit Kombëtar, duke treguar solidaritetin e tij personal dhe të opozitës për këtë kauzë.
Disa orë më parë, Europa Nostra, organizatë evropiane për mbrojtjen e trashëgimisë kulturore evropiane, e ka shpallur Teatrin si një nga 7 ndërtesat më të rrezikuara në Evropë, që duhet mbrojtur dhe restauruar.
Në deklaratën e mbrëmshme të shpërndarë nga Basha, Evropa Nostra tha: “Ne jemi për trashëgiminë kulturore të Evropës.
Prandaj, edhe kundërshtojmë propozimin për prishjen e paligjshme të Teatrit Kombëtar në Tiranë, një nga 7 sitet kulturore më të rrezikuara në Evropë. Teatri është i mbrojtur nga legjislacioni vendas, si dhe shoqëria civile e ekspertët.”
