Presidenti Ilir Meta ka reaguar pas denoncimit të këshilltarit opozitar në Bashkinë e Tiranës, Fabian Topollaj, i cili botoi sot dokumente ku pretendonte se Veliaj manipuloi mbledhjen e këshillit bashkiak, për marrjen e vendimit për shembjen e Teatrit Kombëtar.
Me anë të një postimi në Facebook, ku ka shpërndarë edhe lajmin për denoncimin e Topollaj, Kreu i Shtetit Shkruan: “Nuk mund ta besoj që edhe kjo ka ndodhur!”
Në to bëhet me dije se mbledhja për të votuar për shembjen e TK-së duhet të zhvillohet më 15 maj, në orën 12:00, por që në fakt u mbajt mbrëmjen e së enjtes, një ditë më parë.
Ai thotë se mëngjesin e 13 majit, këshilltarët bashkiakë njoftohen me email për mbledhje të Këshilli Bashkiak online. Në rendin e mbledhjes nuk përfshihej diskutimi për Teatrin Kombëtar.
“Mëngjesin e 13 majit në postën time elektronike më kish ardhur njoftimi për mbledhje Këshilli Bashkiak online (i thënçin) ku në asnjë nga pikat e rendit të ditës nuk përmendej çështja e Teatrit.
Të nesërmen, dt 14 maji, një e-mail tjetër lajmëronte shtimin e çështjes së prishjes së Teatrit Kombëtar me lajmërimin se këshilltarët do mund të dërgonin votën e tyre nëpërmjet e-mail më 15 maj, ora 12:00.
As diskutime dhe asgjë tjetër përveç votës pro ose kundër në Këshillin me një opozitar të vetëm, përfaqësuesin e Bindjes Demokratike atje, që jam unë”, shkroi Topollaj mes të tjerash.
