Produktet bujqësore shqiptare po gjejnë gjithmonë e më tepër terren në Europë. Kështu ka deklaruar ministri i bujqësisë Bledi Çuçi, pasi sipas tij të dhënat që vijnë nga Doganat tregojnë se eksporti vijon të ketë një trend rritës.
“Edhe sivjet që ne ishim në kushtet e situatës së vështirë të krijuar nga Covid-19, eksportet e produkteve bujqësore, sidomos fruta-perimet, u rritën me nivele dyshifrore. Vetëm muaji prill 2020 krahasuar me prillin 2019, kemi pasur një rritje 14% të eksporteve. Kjo vjen e gjitha nga investimet që janë bërë në sektorin e bujqësisë, sidomos tek kultivimi përmes serrava që për Shqipërinë krijojnë avantazh”, është shprehur Bledi Çuçi teksa ishte në Çermë të Divjakës për të parë nga afër një serre me teknologji moderne, që kultivon prej vitesh fruta e perime.
Gjithashtu ministri i Bujqësisë dhe Zhvillimit Rural ka deklaruar se një tjetër e dhënë domethënëse për rritjen ne zhvillimit në bujqësi është raporti mes parave publike që investohen në bujqësi dhe kthimit mbrapsht të tyre në ekonomi.
Për të rritur më tej vlerën e produkteve bujqësore në tregjet ndërkombëtare ofrohet mbështetje që fermat tona të marrin certifikimin Global G.A.P./Fjala.al/
