Në mbrojtje të Teatrit Kombëtar, duke u shprehur se mund të restaurohet me sukses ka dalë edhe Forumi për Mbrojtjen e Trashëgimisë Kulturore.
Përmes një mesazhi në “Facebook”, ky Forum thekson se godina e Teatrit është e rrallë në nivel evropian, që formulon një hapësirë urbane me zhvillimin hapësinor-planimetrik pa krahasim me asnjë tjetër në vend.
“Teatri, në gjendjen e degraduar që ndodhet sot, ngjall shumë mosbesim nëse mund të restaurohet funksionalisht dhe estetikisht; e nëse do arrijë të qëndrojë – me gjuhën e tij arkitekturore e volumore – në sheshin me shije të fortë renesanse që ka patalogu përpara tij.
E kemi thënë dhe e themi me bindje qe po mund të restaurohet me sukses. Teatri, një vepër e arkitektit Berté, është një ndërtese stilistikisht unikale (për Shqipërinë) dhe godinë e rrallë tashmë në nivel Europian, një vepër që i përket repertorit të “racionalizmit monumental”, siç shprehet Gresleri, dhe që për si është krijuar, formulon një hapësirë urbane me zhvillimin hapësinor-planimetrik pa krahasim me asnjë tjetër në vend”, thuhet në reagimin e Forumit.
Më tej ata theksojnë se restaurimi dhe rivlerësimi i tij është vërtetë një sfide profesionale por me sukses të garantuar në pikëpamje të estetikës së imazhit dhe teknologjisë së funksionit.
“Po japim këtu veç një shembull të mënyrës së rivlerësimit të një kino-teatri me stil të tillë të viteve ‘30 në Lisbonë (Portugali), si dëshmi se çfarë humbet Tirana me shembjen e Teatrit të vjetër… do te ishte një mëkat zhdukja, nga ato që nuk harrohen më.
Nga ana tjetër, Teatri i Bjarkës, përsa është estetik në vetvete, e bën konfuz atmosferën e sheshit (që sot ka shije të Renesansës Europiane) pasi ligjëron me leksik të ndryshëm arkitekturor e, për më tepër, me sintaksë çoroditëse qoftë ndaj plastikës klasike të ministrive, qoftë ndaj volumetrisë po aq klasike të Teatrit.
Sipas tij, “Ta restaurojmë Teatrin Kombëtar me inovacionet që ofron epoka jonë, ta shndërrojmë atë në një “kuartier lumiere”, dhe do shohim se qendra e Tiranës do fitojë një “bizhuteri” që frymëzon kulturë dhe art urban”.
