Data 25 Maj ishte caktuar nga UEFA për të dhënë një përgjigje përfundimtare nag 5 federata anëtare mbi mënyrën sesi do të vepronin me kampionatet. Anulimi i sezonit ishte dhe është diçka që nuk rekomandohet pasi do të ketë pasoja. por ndërkohë që federatat merren me rregullat strikte të qeverive, UEFA ka shtyrë limitin duke u dhënë frymëmarrje.
55 federatat anëtare, duke përfshirë dhe FSHF, nuk kanë më fundin e këtij muaji si limit. UEFA ka shtyrë Ekzekutivin nga 27 maj në 17 qershor, duke i lejuar në mënyrë efektive federatave, më shumë kohë për të riorganizuar rifillimin e kampionateve kombëtare.
Presidenti Aleksander Ceferin kishte caktuar afatin e 25 majit në të cilin federatat duhet të komunikonin datat, formatet dhe rregullat e turneve “të verës”. Dy ditë më vonë, të Mërkurën 27, Ekzekutivi do të takohej, gjithnjë me anë të videokonferencës, për të marrë vendimet e para mbi kupat. Gjithçka shtyhet tani për tre javë, dhe mes përfituesve është dhe FSHF që ende nuk ka nëj datë të saktë për Superligën shqiptare.
Shtyrja e UEFA-s është e lidhur gjithashtu me vonesat në lidhje me organizimin e Euro 2020 në vitin pasardhës. Asnjë problem serioz nuk ka pasi të gjitha 12 qytetet kanë konfirmuar gatishmërinë e tyre për të pritur turneun në 2021, megjithatë disa firma ende mungojnë pa të cilat nuk mund të bëhen zyrtare datat e reja.
