Kryetarja e Lëvizjes Socialiste për Integrim, Monika Kryemadhi ka thënë sot se shembja e Teatrit Kombëtar nuk mundi të ndalej, pasi sipas saj 10 veta të paarmatosur nuk mund t’i bënin dot ballë Policisë.
Në një intervistë live për News 24 ajo tha se qëllimi i Aleancës për Mbrojtjen e Teatrit dhe i opozitës nuk ishte që të kishte viktima nga këto protesta.
Më tej Kryemadhi, njësoj si edhe kryedemokrati Lulzim Basha, ka siguruar që Teatri do të bëhet aty ku ka qenë, në atë truall siç ishte duke shtuar se Teatri i Ri është vetëm një projekt- ide dhe jo konkret.
“Duhet një reagim qytetar ndaj identitetit tonë. Një popull asimilohet me dhunë, duke hequr trashëgiminë e vet është emergjente dhe urgjente. Mjafton të shohësh kurrikulat e arsimit po varfërohen. Çdo gjë që ka lidhje me të shkuarën shqiptare po venitet me elementë që nuk kanë jetëgjatësi. Është thirrje urgjente për këtë nismë të Ramës ndaj shkombëtarizimit shqiptar.
Ajo që unë dua të them është që 10 njerëz, apo dhe 10 mijë njerëz të pambrojtur, pa armë, pa ushtri, burra e gra, pensionistë nuk mund të përballen me Policinë e armatosur.
Mbrojtja e Teatrit nuk kishte të bënte vetëm me vendosjen e njerëzit për t’u goditur fizikisht. Rama nuk e ka problem të vrasë njerëz. I vret dhe i harron. I çon në mish për top. Si Aleanca për Teatrin ashtu si çdo përfaqësues tjetër nuk kemi pasur për qëllim të kishim viktima por të nxirrnim fytyrën e Ramës.
Ajo do rindërtohet siç ka qenë, me të njëjtat projekte. E keni dëgjuar dje ministres e kulturës kur tha nuk është projekt, është ide- projekt. Nuk ka projekt
Kodra e Diellit është një rezidencë ku banojnë më shumë socialistë se ne të opozitës. Aty do të rindërtohet në të njëjtin vend Teatri. Ai gjithmonë kështu i ka shembur gjithë veprat kulturore dhe kinematë e Shqipërisë.”- tha Monika Kryemadhi./Fjala.al/
