Edhe dita e sotme ka shënuar rritje shqetësuese të rasteve të të prekurve me koronavirus në vend, me 21 raste, të gjithë në Tiranë.
Ministria e Shëndetësisë ka bërë me dije, se vazhdon të ketë shtrime të reja të pacientëve të prekur, të cilët kanë nevojë për mjekim në Infektiv.
“Vijon të ketë shtrime të reja në spitalin infektiv, ku aktualisht po trajtohen 25 pacientë, nga të cilët 3 janë në terapi intensive”- tha Ministria e Shëndetësisë, në deklaratën e sotme për mediat, ku njoftoi të rejat më të fundit të situatës së koronavirusit në vend.
Specialistja e ministrisë së Shëndetësisë, Flutura Beqo deklaroi se në 24 orët e fundit vazhdon të jetë i lartë numri i rasteve të reja të prekur me Sars-Cov2 në Tiranë, ndërsa të gjithë zonat e tjera rezultojnë pa raste të reja.
Janë testuar 262 qytetarë të dyshuar të prekur me Covid-19 dhe janë konfirmuar 21 raste pozitive, të gjitha në Tiranë.
Nga një hetim i thellë epidemiologjik, rezulton se ndër rastet e reja janë 13 të prekur në QSUT, personel shëndetësor dhe pacientë, kontakte të një infermiere e cila rezultoi pozitive dy ditë më parë, e infektuar jashtë spitalit.
COVID-19 – Statistika (27 Maj 2020)
Testime totale 15094
Testime molekulare 13768
Testime serologjike 1326
Raste pozitive 1050
Raste të shëruara 812
Raste Aktive 205
Humbje jete 33 (Qarku Tiranë 20, Durrës 6, Fier 3, Vlorë 1, Shkodër 2, Kukës 1)/b.b/fjala.al
