Deputetët e opozitës parlamentare kërkuan interpelancë urgjente me kryeministrin Rama për shembjen e teatrit në Kuvend. Seanca parlamentare pritet të shoqërohet me debate.
Në një kërkesë të firmosur nga Rudina Hajdari, Ralf Gjoni dhe disa deputetë të tjerë thuhet se shembja e Teatrit Kombëtar është bërë në shkelje të respektimit të parimeve kushtetuese, interesit publik, si dhe ruajtjes së vlerave historike të trashëgimisë kulturore dhe identitetit kombëtar.
Deputetët pyesin nëse teatrit ju bë një vlerësim kombëtar-kulturor nga ekspertë të fushës Teatrit Kombëtar përpara se të shembej nga kjo qeveri? Sipas tyre, e gjithë procedura e ndjekur është e pambështetur në një vlerësim tekniko-ligjor.
Ata ngrenë pyetjen se cili ishte qëllimi i shembjes së Teatrit Kombëtar, dhe cilat janë interesat konkrete të kësaj qeverie:
1.Në shembjen e Teatrit Kombëtar?
2.Në ndërtimin e një teatri të ri?
3.Pse kjo shembje e Teatrit Kombëtar u bë në 4 e 30 të natës
4.Pse kjo shembje e Teatrit Kombëtar u bë në një kohë kur Shqipëria ndodhej në një gjendje të jashtëzakonshme?
5.Pse pati reagim aq të fortë nga vendet e Bashkimit Evropian dhe organizatat e ndryshme ndërkombëtare në lidhje me shembjen e Teatrit Kombëtar?
6.Pse u transferua Teatri Kombëtar në pronësi të Bashkisë së Tiranës?
7.A u mor për bazë mendimi vlerësues konkret i grupeve të interesit të aktorëve, artistëve, shoqërisë civile?
