Rëndohet bilanci i atentatit mbrëmjen e djeshme në Kurbin, ndërsa zbardhet edhe dinamika e plotë e ngjarjes së rëndë. Bujar Lika (Hasani) vdiq në vend nga plumbat, ndërsa njëri nga dy të plagosurit ndërroi jetë në spitalin e Traumës në Tiranë disa orë pasi u transportua.
53-vjeçari Paulin Gjergji nuk ka mundur që t’u rezistojë plagëve që mori nga plumbat duke ndërruar jetë pavarësisht tentativave të mjekëve. Ndërkohë që i plagosuri tjetër që ndodhet në spitalin e Traumës, Kreshnik Tusha dyshohet se është njëri nga autorët e atentatit.
Ngjarja ndodhi mbrëmjen e djeshme rreth orës 23:00 pranë një hoteli në autostradën Mamurras-Lezhë, në fshatin Gjormë, ku një person ende i paidentifikuar, qëlloi me armë zjarri drejt viktimave.
Mësohet se kanë qenë dy persona të cilët kanë qëlluar me breshëri kallashnikovi drejt Likës e Gjergjit. Sipas informacioneve paraprake ka dyshime se i plagosuri Kastriot Tushi është njëri nga atentatorët.
Burime nga grupi hetimor bëjnë me dije se 21-vjeçari Tushe është qëlluar nga Paulin Gjergji, në momentin kur autorët kanë qëlluar në drejtim të Bujar Likës. Tushe u gjet i plagosur në dalje të hotelit ku ndodhi krimi i dyfishtë.
Kush është e shkuara e Bujar Lika (Hasanit)?
37-vjeçari rezulton një emër i njohur për policinë dhe drejtësinë shqiptare. Në vitin 2015 u përfshi në vrasjen e Enton Nikajt në oborrin e një restoranti të njohur në këtë zonë. Edhe pse Bujar Lika Hasani sipas hetimeve nuk rezulton që të jetë autori i drejtpërdrejtë i krimit, ai është dënuar për bashkëpunim në vrasje.
Për ekzekutimin e Nikajt u dënuan Emiljano Tasho 16 vjet, Erjon Biraçi 2 vjet, Ervis Martinaj 1 vit e 4 muaj, Mirsad Kuçana 1 vit e 4 muaj dhe Bujar Lika (Hasani) 1 vit burg.
Viktima e mbrëmjes së të shtunës dyshohet se ishte mik i ngushtë i Ervis Martinajt, ky i fundit emër i njohur pas ngjarjes së 2018 në ish-Bllok.
Hetimet për vrasjen e Likës dhe Paulin Gjergjit janë ende në fazën e parë dhe ende nuk ka një pistë të fortë mbi motivet e ngjarjes së rëndë. Pranë trupit të viktimës që njihej me dy mbiemra, Lika dhe Hasani u gjet një armë, që nuk dihet nëse u përdor gjatë shkëmbimit të zjarrit.
Tritoli në hotelin e rivalit të Ervis Martinajt
Atentati në autostradën Mamurras-Lezhë ku shënjestra dyshohet se ishte miku i Ervis Martinajt u shënua në orën 22:17, ndërsa disa minuta më pas, rreth orës 22:40 në Tiranë u regjistrua një shpërthim me eksploziv në hotelin e Ervin Matës. Martinaj dhe Mata kanë qenë të përfshirë në përplasjen e Bllokut në 2018 që përfundoi me një të vdekur dhe disa të plagosur./b.b/fjala.al/
