Kryeministri Edi Rama u ka uruar fëmijëve festën e 1 qershorit. E ndërsa festime për këtë datë të shënuar nuk do të ketë për shkak të Covid, Rama thotë se sot festa e 1 qershorit është vetë rikthimi në kopsht dhe çerdhe. “Gëzuar fëmijëve, prindërve, gjysheve e gjyshërve”, shkruan Rama.
Nga ana tjetër edhe Presidenti Ilir Meta ka uruar fëmijët për festën e 1 qershorit duke publikuar edhe 1 foto mes tyre.
Meta thotë se duhet të ecim dorë për dore me fëmijët deri në realizimin e ëndrrave të tyre për të ndërtuar Shqipërinë e vërtetë evropiane.
Po ashtu ai thotë se fëmijëve shqiptarë u duhet t’u sigurohet një e ardhme e sigurt dhe frymëzuese në atdheun e tyre.
“Në Ditën e Festës së tyre, një urim të ngrohtë e të përzemërt për të gjithë fëmijët shqiptarë: Gëzuar 1 Qershorin!
Të ecim gjithmonë dorë për dore me fëmijët, për të mos u dorëzuar deri në realizimin e ëndrrave të tyre shumëngjyrëshe, për t’ju ruajtur buzëqeshjen e çiltër, për të mësuar nga sinqeriteti dhe dashuria e tyre, për të ndërtuar Shqipërinë e vërtetë europiane!
Të mbrojmë të drejtat e fëmijëve çdo ditë me vepra dhe jo me fjalë, dhe t’ju sigurojmë një të ardhme të sigurt dhe frymëzuese në Atdheun tonë!”, shkruan Meta./b.b/fjala.al
