Një ngjarje e rëndë ka ndodhur mbrëmë rreth orës 22:25, në fshatin Gramëz të Krujës, ku janë plagosur më armë zjarri shtetasit Gramoz Bardhi, 34 vjeç, dhe Xhentil Bardhi, 24 vjeç, të cilët janë dërguar në spital, por rrugës kanë ndërruar jetë.
Policia e Krujës është ndihmuar menjëherë nga Policia e Durrësit dhe FNSH-ja e Tiranës për të identifikuar dhe për të arrestuar autorin e dyshuar të vrasjes së dy vëllezërve. Ai është identifikuar si Roland Pula, 32 vjeç, gjithashtu banorë i së njëjtës zonë.
Policia ngriti edhe dy dronë për të identifikuar të dyshuarin dhe ka mundur të gjejë të braktisur makinën e tij pompave të ujit në fshat. Pavarësisht kontrolleve të shumta në zonë, ende nuk është bërë i mundur ndalimi i tij.
Grupi hetimor po vijon punën për zbardhjen e rrethanave të ngjarjes dhe deri më tani dihet se dy vëllezërit Bardhi dhe i dyshuari Pula kanë patur konflikte të vazhdueshme dhe njiheshin si persona problematikë në zonë.
