Janë zbardhur detaje të reja nga vrasja e dyfishtë që tronditi mbrëmë Krujën, ndërkohë që policia është ende në kërkim të autorit të dyshuar. Vëllezërit Gramoz dhe Xhentil Bardhi, 34 dhe 24 vjeç, u qëlluan me armë zjarri nga bashkëfshatari i tyre Roland Pula, 32 vjeç.
Mësohet se sherri ka nisur në lokalin e fshatit Gramëz, ku personat e përfshirë në ngjarje janë konfliktuar fillimisht verbalisht, për të përfunduar në përdorimin e armëve. Pula ka qëlluar me armë drejt dy vëllezërve, të cilët kanë ndërruar jetë gjatë rrugës për në spital.
Viktimat dhe autori kishin patur konflikte të hershme midis tyre. Raportohet se ata ishte përplasur edhe herë të tjera, madje kishin arritur deri në plagosje.
Si Roland Pula, ashtu edhe dy vëllezërit Bardhi, ishin skeduar për përplasje në këtë zonë. Ndërsa, autori i dyshuar i ngjarjes ka qenë më parë edhe i dënuar me burg për plagosje.
Pas vrasjes së dyfishtë, policia ngriti edhe dy dronë për të identifikuar të dyshuarin dhe ka mundur të gjejë të braktisur makinën e tij pranë pompave të ujit në fshat. Pavarësisht kontrolleve të shumta në zonë, ende nuk është bërë i mundur ndalimi i tij.
*Në foto, Xhentil Bardhi
