Kryeministri Edi Rama ka bërë me dije se brenda javës do të bëhet i mundur çlirimi i qytetit të Durrësit nga plehrat. Qyteti bregdetar është mbytur këto ditë nga plehrat pasi fusha e Porto Romanos është mbyllur për depozitim dhe bashkia e Durrësit ka ngurruar të firmosë marrëveshjen për transportin e tyre drejt Sharrës në Tiranë.
Por kryeministri Rama tha në emisionin “Open” se brenda javës mbyllet marrëveshja dhe se plehrat e Durrësit do të depozitohen në landfillin pranë zonës së Kombinatit.
“E gjitha lidhet me një transformim shumë të rëndësishëm që ne kemi nisur për të çliruar Durrësin nga zona kanceroze e Porto Romanos. Kemi ndërmarrë një projekt goxha ambicioz për ndërtimin e një parku të madh urban pikërisht aty ku për dekada ishte një zonë me vargmale plehrash dhe mbipopullim derrash.
Këto ditë që flasim po kryhet një proces finalizimi me bashkinë e Durrësit dhe agjencinë përkatëse shtetërore që mbulon edhe këtë fushë. Shumë shpejt brenda javës do të kemi një marrëveshje përfundimtare për të bërë të mundur lëvizjen e mbetjeve të Durrësit në landfillin e Sharrës.
Situata do të stabilizohet brenda pak ditësh sepse faktikisht duhet të rrisnim presionin pozitiv mbi bashkinë e Durrësit për të finalizuar këtë marrëveshje. Bashkia kishte një ngurrim për shkak të një kostoje që lidhet me transportin”, tha Rama./Fjala.al
s.k
