Ministria e Arsimit ka publikuar përgjigjet e sakta të testit të Gjuhë-Letërsisë. Në testin me alternativa me 60 pyetje është zbuluar edhe përgjigja që duhet të rrethohej nga maturantët për pyetjen se çfarë bëri Turi.
Por çfarë ishte kjo pyetje, që irritoi maturantët?
Barka filloi të rrëshqiste me shpejtësi përgjatë lumit të rrëmbyer, ndërsa katër njerëzit që ndodheshin në të bërtisnin nga euforia. Zemrat e tyre rrihnin fort, ndërsa manovronin me shkathtësi lopatat përmes ujërave të trazuara.
Madje edhe Turi, i cili fillimisht ishte ndier i shqetësuar në lidhje me udhëtimin me barkën, e harroi frikën kur valët e akullta përplaseshin mbi të. Papritur ai vështroi skajet e mprehta të një shkëmbi të dhëmbëzuar që iu shfaq përpara.
Cila nga fjalitë e mëposhtme mund të vijojë në të njëjtin stil aksionin e nisur në paragrafin e dhënë më sipër?
Përgjigja e saktë që duhet të rrethohej nga maturantët sipas hartuesve të testit ishte; Turi u hodh në të djathtë, për të shmangur shkëmbin dhe gati e përmbysi varkën
Këto pyetje maturantët i cilësojnë jashtë programit, subjektive dhe që nuk kishin kuptim logjik.
Ndërkohë kujtojmë se protesta e maturantëve është shtrirë sot edhe në rrethe. Sot në protestë janë ngritur edhe maturantët e Durrësit dhe të Fierit. Maturantët e këtyre rretheve pasi kanë marshuar në rrugët e qytetit, janë mbledhur përpara Drejtorive Arsimore.
Maturantët kanë kërkuar të plotësohen kërkesat e tyre afatshkurtra, pasi në të kundërt do të bojkotojnë provimet e radhës të Maturës Shtetërore.
“Të vlerësohet nota mesatare e notës së Gjuhë Letërsisë në shkollë dhe 40% e provimit. Nëse nuk plotësohen kërkesat tona të qarta dhe afatshkurtra, do të ketë bojkot të provimeve. Nëse arrijmë konsensus, do të vazhdojmë provimin”, tha një maturant.
Ndërsa një studente i drejtoi një mesazh të prerë ministres së Arsimit, Besa Shahini, duke i thënë se: “Është e pamundur të shpërbëhet gjithë ajo që kemi lexuar. Ne vërtet jemi të vegjël, por kur mblidhemi bashkë, ne shkatërrojmë botën”.
Edhe në Lezhë maturantet kundërshtojnë tezen e Gjuhës-Shqipe dhe Letërsisë. Në shenjtë revolte një përfaqësi e tyre protestuan këtë të diel në qendër të qytetit.
Me pankarta në duar dhe me thirrje turp për ministrinë, maturantët kërkuan ribërjen e provimit. Ata thonë se në tezë ka pasur pyetje jashtë kurrikulës për të cilën ishin përgatitur dhe këtë e konsiderojnë absurditet.
Nga qendra e qytetit maturantët marshuan drejt godinës së Zyrës Arsimore, duke i vendosur pankartat me mbishkrime në hyrjen e këtij institucioni, ndërsa kanë paralajmëruar se protestat nuk do të ndalen derisa problemi i tyre të marrë zgjidhje./Bl.Ba/Fjala.al
