Grupi Parlamentar PPE-së dorëzoi dje në Parlamentin Evropian një amendament për rezolutën mbi Ballkanin Perëndimor, ku Shqipërisë i kërkohet plotësimi i 15 kushteve për integrim deri në vjeshtë, kur pritet të mbahet konferenca e parë ndërqeveritare nga vendet anëtare.
Rezoluta e hartuar nga eurodeputeti kroat, Tonino Picula, është e përgjithshme dhe nuk përmend kushtet që BE-ja i caktoi qeverisë Rama, në mars 2020. Amendamenti mban firmën e eurodeputetes Kinga Gàl, raportere e PPE-së për këtë rezolutë me kërkesën e raporterit për Shqipërinë, David Lega, dhe me pëlqimin e koordinatorit Michael Gahler, cilëson se Parlamenti Evropian: “Thekson 15 kushtet e caktuara nga Këshilli i Bashkimit Evropian që Shqipëria duhet të ketë përmbushur përpara thirrjes konferencës së parë ndërqeveritare me shtetet anëtare”.
Kjo është iniciativa e dytë e PPE-së për këtë çështje, pas një deklarate të bërë para tri ditëve, ku përmendeshin disa herë 15 kushtet dhe listoheshin veçanërisht ato më pikantet: dënimi i votëblerësve, anulimi i ligjeve për median, nevoja për zgjedhje vërtet të lira e të ndershme, si edhe anomalia e madhe e pushtetit lokal.
Javën e shkuar u mësua se qeveria kishte hequr nga plani i punës për integrimin evropian kushtin “procedimi penal i votëblerësve”, por Grupi i PPE-së inicioi dje amendamentin për 15 kushtet, duke rikthyer vëmendjen te Shqipëria kur ndodhemi vetëm disa muaj para mbledhjes ndërqeveritare që pritet të thirret nga Gjermania, pasi të marrë presidencën e radhës së Bashkimit Evropian, në gjysmën e dytë të këtij viti.
la.mi/Fjala.al
