Goditet një rast i tentativës për transfertë të parave në mënyrë të paligjshme, duke sekuestruar 32 mijë euro të padeklaruara.
Policia Kufitare e Kapshticës, në bashkëpunim me shërbimet doganore dhe ato të policisë Korçë, në sajë të forcimit të kontrolleve, kanë evidentuar dhe goditur një rast të transfertave të parave në mënyrë të paligjshme jashtë vendit.
Pas analizës së riskut të bërë nga shërbimet e policisë Kufitare, gjatë kontrollit të ushtruar në vijën e dytë, shtetasit V. M., 50 vjeç, i cili u paraqit në dalje të Republikës së Shqipërisë si këmbësor, iu gjetën në çantën personale 32.000 euro të padeklaruara nga ana e tij, të cilat iu sekuestruan në cilësinë e provës materiale.
Ndaj të dyshuarit nisi procedimi penal, ndërsa materialet iu referuan Prokurorisë së Korçës, për veprën penale Mosdeklarimi në kufi i të hollave dhe i sendeve me vlerë”./Bl.Ba/Fjala.al
