Lajçak: Një marrëveshje e mirë Kosovë-Serbi s’mund të arrihet pa BE

113 563 lexime

124,178FansaPëlqeje

I ngarkuari special i BE për dialogun Kosovë-Serbi përfundoi vizitën tri ditore në Kosovë. Ai tha se askush nuk mund t’i ofrojë të ardhme evropiane Kosovës, përpos Bashkimit Evropian.

Nga Bekim Shehu

Blloku evropian nuk mund të lihet anash nga procesi i bisedimeve dhe askush përpos Bashkimit Evropian nuk mund t’i ofrojë Kosovës të ardhme evropiane. Kështu deklaroi në Prishtinë në një konferencë për media në përfundim të vizitës tri ditore në Kosovë, i ngarkuari special i Bashkimit Evropian për dialogun ndërmjet Kosovës dhe Serbisë, Mirosllav Lajçak. Ai tha se për takimin e 27 qershorit ndërmjet Kosovës dhe Serbisë që pritet të mbahet në Shtëpinë e Bardhë, ka dëgjuar, por nuk është këshilluar.

“Shtetet e Bashkuara janë një partnere e rëndësishme për ne dhe se historia ka dëshmuar se ne kemi qenë gjithmonë të suksesshëm kur kemi punuar së bashku, në të njëjtën kohë. Kosova është në Evropë dhe askush tjetër nuk mund t’i japë një të ardhme evropiane Kosovës përveç BE-së. Një marrëveshje e mirë është marrëveshje që e sjell Kosovën dhe Serbinë më afër Bashkimit Evropian dhe nuk mendoj se një marrëveshje e tillë mund të arrihet pa praninë e BE-së”, tha Mirosllav Lajçak. Javën e ardhshme ai do ta vizitojë edhe Beogradin dhe pas këtyre konsultave në Prishtinë dhe Beograd, ai do të caktojë një datë kur do të rinisë dialogu i ndërmjetësuar nga Bashkimi Evropian. “Pres që dialogu të fillojë së shpejti. Javën e ardhshme vizitoj Beogradin dhe do të flas me presidentin Vuçiç që të dakordohemi dhe do të publikojmë një datë për rifillimin e dialogut. Duam të lehtësojmë një marrëveshje gjithëpërfshirëse për normalizim të marrëdhënieve ndërmjet Kosovës dhe Serbisë. Mandati im është normalizimi i marrëdhënieve mes dy vendeve dhe një marrëveshje eventuale ndërmjet Kosovës dhe Serbisë, duhet të zgjidhë të gjitha çështjet e hapura”, tha Lajçak. Pala kosovare gjatë të gjitha bisedave që kishte me Lajçak, në mesin e kërkesave kishte edhe liberalizimin e vizave për Kosovën.

“Kosova meriton liberalizim të vizave, për mua nuk është pyetje a do të bëhet, por kur do të bëhet? Do të bëhet. Kosova është pjesë e Evropës, problemet tuaja janë problemet tona, suksesi juaj është suksesi ynë. E ardhmja juaj është evropiane. Rruga e Kosovës drejt BE-së shkon përmes këtij dialogu”, tha i ngarkuari special i Bashkimit Evropian për dialogun ndërmjet Kosovës dhe Serbisë, Mirosllav Lajçak në përfundim të vizitës tri ditore në Kosovë. Në kohën kur Mirosllav Lajçak mbante konferencë për medie, ambasada e SHBA-së në Prishtinë shpërndau një deklaratë përmes twitter nga i dërguari i Shtëpisë së Bardhë për dialogun mes Kosovës dhe Serbisë, Richard Grenell. Sipas këtij të fundit, takimi i 27 qershorit në mes të përfaqësuesve të Prishtinës dhe Beogradit në Uashington është mundësi për zhvillim të ri dhe investime ekonomike. “Shtetet e Bashkuara shpresojnë se liderët në Kosovë dhe Serbi do ta shfrytëzojnë mundësinë e rikthimit në dialog dhe që të nisin një epokë të re të stabilitetit dhe mirëqenies. Njerëzit e këtij rajoni nuk meritojnë asgjë më pak”, citohet Grenell.

Lexo edhe :  Konstituimi i Kuvendit të Kosovës, Osmani nuk pajton liderët, premton takime të tjera

Presidenti i Kosovës Hashim Thaçi nga na e tij, tha se ai shpreson që takimi i 27 qershorit të rrisë shpresat për një marrëveshje finale mes Kosovës dhe Serbisë dhe këtë takim ai e sheh si një “kthesë historike dhe mundësi për arritjen e paqes’.

“Takimin e paralajmëruar në Shtëpinë e Bardhë e konsiderojmë si kthesë historike dhe mundësi të papërsëritshme për fillimin e një procesi tepër të vështirë, shumë të rëndë, por të domosdoshëm për arritjen e paqes. Qytetarët e Kosovës e dinë shumë mirë se nga Uashingtoni gjithmonë kanë ardhur lajme të mira. Kështu do të jetë edhe sot, por edhe në të ardhmen. Kam besim të plotë, se edhe takimi në Uashington do t’i kontribuojë konsolidimit të brendshëm dhe atij ndërkombëtar të shtetit të Kosovës”, tha presidenti Thaçi në një konferencë për medie. Ai tha se pala kosovare në Shtëpinë e Bardhë shkon e përgatitur dhe ai do të ketë qëndrime të koordinuara me kryeministrin Avdullah Hoti. “Ne do të flasim me një zë. Do të respektojmë vullnetin e qytetarëve të Kosovës. Do të kemi një koordinim ndërinstitucional. Konsultat janë duke vazhduar. Kosova ka bartësit e institucioneve të shtetit, përfaqësuesit legjitim në hierarkinë institucionale”, u shpreh Thaçi.

Kryeministri i Kosovës, Avdullah Hoti, gjatë ditës së enjte (18.06) takoi me dyer të mbyllura ambasadorët e vendeve të QUINT-it në Kosovë, të cilëve siç thuhet në një komunikatë, “u shpalosi platformën e Qeverisë së Kosovës për dialogun me Serbinë”. “Parimet mbi të cilat do ta vendosim këtë proces janë integriteti territorial i Kosovës, që është i panegociueshëm, karakteri unitar i shtetit të Kosovës, ndërsa marrëveshja duhet të jetë në përputhje me Kushtetutën e Republikës së Kosovës”, citohet kryeministri Hoti në komunikatën e Kryeministrisë. Sipas kryeministrit Hoti, “Qeveria e Kosovës e ka strukturuar qasjen në këtë proces të dialogut duke e formalizuar mënyrën se si duhet të zhvillohet ai, por që objektiv kryesor në gjithë këtë proces është njohja reciproke në mes dy vendeve”.

Pas takimit të 27 qershorit ndërmjet Kosovës dhe Serbisë, që mbahet në Shtëpinë e Bardhë në Uashington dhe një takimi që së shpejti mund të mbahet në Bruksel i ndërmjetësuar nga i ngarkuari i BE-së Mirosllav Lajçak, një Samit për dialogun Kosovë-Serbi do të zhvillohet në Paris në javën e tretë të korrikut. Dialogu ndërmjet Kosovës dhe Serbisë, u ndërpre në nëntorin e vitit 2018 kur qeveria e Kosovës e udhëhequr nga Ramush Haradinaj, vendosi tarifë 100% ndaj mallrave serbe. Që nga ajo kohë, Beogradi e ka kushtëzuar rikthimin në tavolinën e bisedimeve me heqjen e tarifës dhe së fundi edhe të reciprocitetit, masë kjo e Kosovës që nuk u mbështet as nga faktori ndërkombëtar./Fjala.al/Ke.Ba

 

Të fundit

Durrës, përfshihet nga flakët makina! Shoferi përfundon me djegie

Një automjet është përfshirë nga flakët pasditen e sotme në afërsi të Torrës Veneciane, në qytetin e Durrësit. Ngjarja ka...

Sulm me thikë në Gjermani, autori plagos 5 persona

Një person sulmoi të paktën pesë persona në Bielefeld të Gjermanisë. Policia tha se tre persona pësuan lëndime të rënda dhe po trajtohen në...

Kapen dy shqiptarët në ‘shtëpi bari’, Gjykatësi: Jeni rrota të vogla të një makinerie

Dy të rinj shqiptarë kanë rënë në prangat e policisë britanike pasi u kapën në një "shtëpi bari" duke u kujdesur për rreth 900...

Një protestë kundër vullnetit popullor

Protesta e 16 majit e organizuar nga berishizmi në mbrojtje të votës së lirë nuk ishte kundër qeverisë Rama apo pushtetit socialist. Pavarësisht se...

PS nis festën në Korçë për votat e diasporës, thelloi rezultatin

Është mbyllur numërimi i votve të diasporës të ardhura nga Greqia për qarkun e Korçës. Burime për A2 CNN bëjnë me dije se me mbylljen...

Lajme të tjera

Web TV