Policia e Lezhës zbardhi paraditen e sotme detaje për operacionin në të cilin u zbardh krimi i rëndë ku mbetën të vrarë Paulin Gjergji dhe Bujar Lika, ndërsa u prangos autori kryesor i vrasjes.
Burime për “Fjala.al” bënë me dije se autori i dyshuar përdorte tre identete, Eduard Lama, Leandro Lamaj dhe Leandro Simoni.
Lamaj, gjatë marrjes në pyetje nga policia ka treguar si ndodhi ngjarja. Ai ka thënë se nuk kishte shkuar në hotelin ku ndodhi krimi për ti vrarë, por për të shkatërruar hotelin, pasi pronari i tij i kishte borxh një shumë të konsiderueshme parash.
“Nuk vajta për ti vrarë. Më kishte borxh i zoti i hotelit dhe vajta për të shkatërruar godinën. Nisën të më qëllonin me armë, duke u ndjerë i rrezikuar nisa të qëlloja dhe unë”, ka thënë Lamaj, para hetuesve.
Mësohet se familjarët e Eduart Lamajt janë mbajtur në vëzhgim prej ditësh, pasi policia kishte identifikuar përfshirjen e tij nga provat e gjetura në vendin e ngjarjes.
Lamaj ka qëndruar te një i afërm në Tiranë dhe ka kërkuar mjekim për plagën e marr në këmbë në kliniken private për shkak të infektimit.
Burime thanë gjithashtu se Lamaj ka qenë në përgjim. Ndërkohë është duke u hetuar për përfshirje në grup kriminal.
Gjatë operacionit policor të koduar “Klinika” u vunë në pranga edhe dy mjekë të cilët po mjekonin në spitalin privat autorin e dyshuar, i cili kishte mbetur i plagosur nga shkëmbimi i zjarrit natën e krimit./Bl.Ba/Fjala.al
