Koronavirusi i merr jetën mjekut të parë në Qendrën Spitalore Universitare Tiranë, hematologut Arjan Pushi, duke e çuar në 63 numrin e viktimave.
Profesor Arjan Pushi ka patur një karrierë të spikatur në fushën e hematologjisë dhe ka përgatitur shumë breza studentësh të Mjekësisë.
Ministria e Shëndetësisë i shpreh ngushëllime familjarëve dhe miqve të profesor Arjan Pushit.
Lidhur me vdekjen e tij ka reaguar ministrja e Shëndetësisë Ogerta Manastirliu, e cila thotë se ndarja nga jeta e Profesor Arjan Pushit është një dhimbje e madhe për familjen, për miqtë e tij, për kolegët, pedagogët e Universitetit të Mjekësisë ku ka shërbyer për shumë vite.
Manastirliu shprehet se kontributi i çmuar i profesor Arjan Pushit për mjekësinë shqiptare, do të mbetet i pashlyeshëm ndër breza.
“Me gjithë përpjekjet e kolegëve, të cilët bënë të pamundurën për ta mbajtur në jetë në spitalin infektiv, prof. Arjani nuk ia doli dot, në betejën me virusin e rrezikshëm. U prehsh në paqe Profesor Pushi! Ngushëllime të sinqerta familjes dhe miqve. Ju jemi pranë në këto momente të vështira!”, deklaron ministrja e Shëndetësisë./Bl.Ba/Fjala.al
