Epidemia e virusit “Covid-19”, ka krijuar, për momentin, situata të pazakonta në shumë rrafshe të jetës dhe sporti nuk mund të bënte përjashtim. Kështu për shembull, ndryshe nga të gjitha sezonet e deritanishme, ky i sivjetmi, që nuk ka nisur ende ka bërë që, në mungesë të garave në pistë, të intensifikohen garat në merkaton e pilotëve. Kështu, “Dukati” është prodhuesi i vetëm i motorëve në Kampionatin Botëror të Moto GP që ende nuk e ka përcaktuar 100% të ardhmen e skuadrës së tij zyrtare.
Me Xhek Millerin si pilotin e vetëm të konfirmuar për 2021-shin dhe Horhe Martín si një zëvendësues për australianin në skuadrën kliente të “Pramak”-ut, dy vendet bosh të mbetur te “Desmosediçi” janë një pasuri shumë e lakmuar. Themi dy, në vend të njërës, sepse mospërputhjet e kërkesës ekonomike midis markës bolonjeze dhe Andrea Doviciozos ende nuk kanë siguruar një marrëveshje për zgjatjen e qëndrimit të italianit në rajonin Emilia-Romanja.
E nga kjo situatë janë disa pilotë si Horhe Lorenco dhe Johan Zarko, të cilët duan të fitojnë një vend për të konkurruar në nivelin më të lartë të Moto GP-së. “I vetmi vend që mbetet është ai i Doviciozos tek “Dukati”, – ka thënë Zarkoja. – Por unë mendoj se është ai është i rëndësishëm për ta. Ai është një pilot që mund të arrijë në podium në çdo garë dhe për një ekip zyrtar është gjëja e duhur për të bërë. Për mua është një ëndërr, nëse krijohet mundësia që të konkurroj tek “Dukati”.”
Duhet kujtuar këtu se Lorenco ka pasur mosmarrëveshje të mëdha me Zarkonë, kur e akuzoi francezin për mungesë ndershmërie në dhënien e motorit të tij “Honda” në Valencia. Por sipas të përditshmes sportive spanjolle “AS”, Lorenzo ka më shumë se 50 % mundësi që të kthehet në kategorinë më të lartë të garave me motorë në 2021-shin me skuadrën italiane.
la.mi/Fjala.al
