Publikimi i dosjes së shkrimtarit Martin Camaj dhe Ernest Koliqi nga studiuesi Auron Tare në të cilën thuhet se Camaj ka qenë bashkëpunëtor i Sigurimit të Shtetit edhe agjent i UDB-së, duke u përfshirë në veprimtari spiunazhi ka nxitur shumë debate.
Për këtë dosje studiuesi Ardian Ndreca tha se ka dalë në mënyrë të paligjshme.
Sakaq një ditë më parë, Kryetarja e Autoritetit për Informacion për Dosjet e ish-Sigurimit të Shtetit, Gentiana Sula ka firmosur një urdhër hetimi.
Teksa paraditen e kësaj të shtune me anë të një postimi në rrjetin social, Profesor Agron Tufa shkruan se AIDSSH ka shkelur ligjin.
Sipas Tufës “Tare nuk plotëson një kusht të rëndësishëm, nuk është studiues, por enverist. Nuk ka asnjë punim shkencor apo libër. Është një bashkëpunëtor i shoqatës së Rustem Peçit dhe kaq.”
Postimi i plotë
Zakonisht Autoriteti (AIDSSH) u kthen përgjigje kërkesave të studiuesve, maksimumi, pas një viti. Shiheni si vepron me Taren: më 26 maj 2020 ai bën kërkesë dhe më 2 qershor 2020 merr 2 dosje. Do të ishte interesante të dihej, psh, nëse kërkesat e të tjerëve të datës 26 maj, janë ndjekur me të njëjtën përparësi dhe kthyer përgjigje më 2 qershor, apo ky është një rast i përzgjedhur me dashuri? Sepse duhet thënë, që kërkesave që bënte ISKK, Autoriteti ose u përgjigjej pas 6 muaj – një viti, ose nuk u përgjigjej fare, për çka kemi pasur një sërë ankimesh në AIDSSH dhe në Raportet e veprimtarisë Vjetore në Parlament.
Auron Tare nuk plotëson një kusht të rëndësishëm, nuk është studiues, por enverist. Nuk ka asnjë punim shkencor apo libër. Është një bashkëpunëtor i shoqatës së Rustem Peçit dhe kaq. Kësisoj në këtë pikë Autoriteti ka shkelur ligjin.
Bo.Ba/fjala.al
