Nën-19-vjeçarët e Dedes, në Durrës, Nën-17-vjeçarët e Beqirit, në Shkodër, në program edhe nga dy miqësore. Kështu, Kombëtarja shqiptare e Nën-19-vjeçarëve, e drejtuar nga trajneri Nevil Dede ka filluar të martën grumbullimin dhe seancat stërvitore në qytetin e Durrësit.
Skuadra e Dedes do të ndjekë një program stërvitor prej katër ditësh, nga data 14, deri më 17 korrik 2020, ku ka të planifikuar edhe 2 sfida miqësore me Nën-19-vjeçarët e Apolonisë dhe Kombëtaren e Nën-18-vjeçarëve. Ky grumbullim do t’i shërbejë trajnerit Dede për t’u njohur me lojtarët e rinj si edhe për të parë nga afër gjendjen e tyre.
Stafi teknik i Kombëtares së Nën-19-vjeçarëve ka thirrur 25 futbollistë në këtë grumbullim dhe spikat fakti që shumica dërrmuese e tyre vijnë nga ekipet e kampionatit kombëtar të kësaj grupmoshe, Ndërkohë, edhe Kombëtarja kuqezi e Nën-17-vjeçarëve, e drejtuar nga trajneri Elvin Beqiri ka filluar grumbullimin dhe seancat stërvitore në qytetin e Shkodrës.
Edhe kjo skuadër do të ndjekë një program stërvitor prej katër ditësh, nga data 14, deri më 17 korrik 2020, ku ka të planifikuar edhe 2 sfida miqësore me Nën-17-vjeçarët e Vllaznisë dhe ata të Shënkollit. Stafi teknik i kësaj Kombëtareje ka thirrur në këtë grumbullim 24 futbollistë, nga të cilët ¼-ta e tyre vijnë nga klube jashtë Shqipërisë.
/En.Br./Fjala.al
