Tirana ka patur një tjetër përballje të martën, por këtë radhë, jashtë fushës së blertë, në mjediset e Federatës Shqiptare të Futbollit, teksa disa protagonistë bardheblu dëshmuan në Komisionin e Etikës.
Njëri prej tyre, krahas presidentit Refik Halili, kapitenit Erando Karabeci dhe portierit Ilion Lika, ishte edhe trajneri i Tiranës, Emanuel Egbo, i cili pohoi duke folur për mediat se takimi i parë i gjysmëfinales së Kupës së Shqipërisë me ballshiotët u luajt gabim nga ekipi i tij, por refuzoi që ndeshja të jetë fiksuar qëllimisht nga lojtarët apo klubi.
“Nuk mund ta fus një mendim të tillë te përfundimi, – ka këmbëngulur ai. – Që kur kam marrë drejtimin e skuadrës deri tani kemi qenë një familje. Vetëm Zoti nuk bën gabime, njerëzit bëjnë. Një ndeshje luajmë keq, ndeshjen tjetër mund ta luajmë mirë.
Keni parë dhe vetë, pjesën e parë në shumë ndeshje, kemi luajtur keq, pjesën e dytë e kemi kthyer rezultatin. Kjo me Bylisin ishte thjesht një ndeshje që duhet ta harrojmë. Kemi ndeshjen e kthimit të mërkurën dhe urojmë ta fitojmë.” Nigeriani nuk pranon të komentojë mbi analizat që kanë bërë kompanitë e monitorimit të basteve.”
“Nuk e kam parë analizën ndërkombëtare, ne kemi bërë analizat tona, – ka thënë ish-portieri bardheblu. – Kemi shpjeguar çfarë kemi bërë mirë dhe çfarë nuk duhej të bënim. Jemi në rregull. Dënimi është në dorën e tyre, unë kam shpjeguar çfarë kam parë.
Kam besim se do luftojmë të mërkurën në fushë dhe do të japim maksimumin. Kemi shënuar një gol atje dhe do të aktivizojmë ata që janë më të mirët. Nuk mendoj për akuzat, mendoj si të jap 100%-shin kur të futem në fushë”, – ka përfunduar trajneri i Tiranës Emanuel Egbo./Bl.Ba/Fjala.al
