Verilindorët shpërndajnë videon e dy rasteve të diskutueshme, që sipas tyre, vendosën fatin e takimit. Pas eliminimit nga Kupa e Shqipërisë, Kukësi ka shfryrë ndaj gjyqtarëve dhe, një njoftim të shkurtër, të shpërndarë për mediat dhe të shoqëruar me një video, klubi verilindor veçon, sipas tij, rastet e diskutueshme.
“Në një nga ndeshjet më të rëndësishme për ekipin tonë, protagonist bëhet sërish gjyqtari”, – shkruhet në njoftimin e Kukësit.
“Eliminimi në gjysmëfinalen e Kupës erdhi si pasojë e dy gabimeve të gjyqtarit të ndeshjes dhe ndihmësve të tij”, – shton njoftimi. Kështu, sipas Kukësit, “në minutën e 73-të Çyrbja i merr topin me faull mbrojtësit Krasniqi para syve të anësorit Bregasi, megjithatë nuk akordohet faull dhe nga ky aksion erdhi goli i barazimit.” Po kështu, vijon klubi verilindor, “pak minuta më vonë, krosimi i Kallakut gjen në pozicion jashtë loje mbrojtësin Rustem Hoxha i cili shënon me kokë, por për anësorin, goli ishte i rregullt.”
Pasi kishte barazuar pa gola duelin e parë në fushën e vet në “Elbasan Arena” para dy javësh, Kukësi vijoi të mundej në ndeshjen e kthimit të mërkurën në Durës përballë Teutës, duke u mundur 1-2 megjithëse kaloi i pari në epërsi. Kështu, e vetmja shpresë për trofe për verilindorët mbetet kampionati, ku matematika e mban në betejën për titull me Tiranën.
