Menaxheri i futbollistit të Verder Bremenit flet për destinacionin e mundshëm të 24-vjeçarit. Është shndërruar në fakt në një nga emrat më të përfolur të merkatos së verës dhe, me përfundimin e sezonit të Bundesligës, ku skuadra e tij, Verder Bremeni arriti të mbijetojë në nivelin më të lartë të kampionatit gjerman të futbollit, spekulimet për të ardhmen e tij kanë ardhur duke u shtuar.
Dhe këtyre zërave u ka dhënë më tepër shtysë vetë menaxheri i futbollistit të njohur të Kosovës, Milot Rashicës, dhe ish-futbollisti i shquar i kombëtares së Shqipërisë Altin Lala. I cituar nga mediat gjermane, ai pranoi se Lajpcigu i përshtatet më së miri stilit të lojës së 24-vjeçarit. Duke folur për një kanal televiziv pranë klubit të Verderit, Lala shtoi se Lajpcigu është një klub i aftë t’i bëjë lojtarët më të zotë.
Ndërkohë, sipas “Sport Bild”-it, Rashica ka refuzuar Milanin dhe Liverpulin dhe dëshiron të luajë për skuadrën e njohur gjermane. “Lajpcigu është një klub interesant, – ka pohuar Lala. – Trajneri dhe stili i tyre i lojës i përshtaten shumë mirë Milotit.
Përveç kësaj, ata janë një klub që i përmirësojnë futbollistët”, – përfundoi ish-futbollisti kuqezi. Verder Bremeni pranon ta shesë mesfushorin me tipare sulmuese për jo më pak se 20 milionë euro, ndërsa lista e klubeve që e kërkojnë është mjaft e pasur.Ka.Li/fjala.al
