Bardheblutë bëjnë “detyrën” në kryeqytet, hedhin një hap drejt titullit “kampion”. Tirana nuk ka gabuar në shtëpi ndaj Flamurtarit, duke fituar të shtunën me shifrat 2-0 dhe duke hedhur edhe një hap tjetër drejt titullit “kampion”. Në fakt, ndeshja e luajtur në Stadiumin “Selman Stërmasi” të kryeqytetit ka parë Tiranën ta nisë më mirë, dhe 10 minutave të para, bardheblutë rrezikojnë 3 herë, me anë të Ngo’osë, Hoxhallarit dhe Muçit, por goditja e britanikut nuk gjen katërkëndorin, ndërsa dy të tjerat gjejnë portierin mik të vëmendshëm.
Në minutën e 13-të, Kobina gabon në mënyrë të pabesueshme brenda zonës, ndërsa 5 minuta më pas edhe Muçi është i pasaktë në goditje. Trysnia e Tiranës do të konkretizohet në minutën e 20-të, kur Ngo’ do të pengohet brenda zone nga Gocaj, dhe gjyqtari Bastari akordon 11-metërsh e Muçi nuk gabon nga pika e bardhë. Tirana kalon në epërsi, me atë që është goli i 7-të këtë sezon për talentin bardheblu. 20 minutat e mbetura do të shohin një lojë që bie në kllapi dhe vetëm 5 minuta para fundit të pjesës së parë, Ngo’ do të shpërdorojë një rast shumë të volitshëm për shënim.
Përtej protestave të vlonjatëve për një 11-metërsh, 45 minutat e para do të mbyllen me epërsinë minimale të kryeqytetasve, ndërsa to të dytat nisin me Ngo’në që ndëshkohet me karton të verdhë dhe humbet sfidën me Laçin, por edhe dy raste që kanë për protagonist shkodranin e Flamurtarit, Pjeshka, që sidoqoftë nuk konkretizohen. Tirana kundërpërgjigjet dhe rrezikon me anë të Kobinasë, i cili brenda zonës ka bërë më të vështirën duke e dërguar topin jashtë katërkëndorit vlonjat.
Flamurtari vijon ta vërë në vështirësi Tiranën, por, përkundër rrjedhës së lojës, Tirana dyfishon shifrat në minutën e 67-të, me anë të Ismailgecit. Vlonjatët provojnë të kundërpërgjigjen me Ribajn, që nuk e gjen kuadratin pak minuta më pas, ndërsa 8 minuta para fundit, Tirana shpërdoron edhe një rast për të trefishuar epërsinë.
Sidoqoftë, mbyllet me fitoren 2-0 kjo përballje me Flamurtarin dhe bardheblutë bëjnë detyrën, duke pritur tanimë përballjen e së dielës midis Vllaznisë dhe Kukësit.Ka.Li/fjala.al
