Ditën e sotme është firmosur marrëveshja mes qeverisë shqiptare dhe asaj italiane për angazhimin e 95 milionë eurove, ku 90 milionë euro janë kredi e butë, ndërsa 5 milionë do të jenë për grantin e rindërtimit të objekteve publike.
Ka qenë ministri për Rindërtimin Arben Ahmetaj që ka firmosur marrëveshjen me ambasadorin italian Fabrizio Bucci.
Kredia 90 milionë euro me interes shumë të vogël do të përdoret në sektorin e energjisë, zhvillimin e ekonomisë së detit dhe rritjen e kapaciteteve për përballimin e fatkeqësive natyrore, me përmirësimin e flotës dhe fuqizimin e burimeve njerëzore të emergjencave civile.
Konkretisht, kredia 90 milionë euro do të përdoret:
a) Në sektorin e energjisë, për përmirësimin e mëtejshëm të linjave të transmetimit
b) Në zhvillimin e ekonomisë së detit, për përmirësimin e infrastrukturës portuale dhe peshkimit
c) Në rritjen e kapaciteteve për përballimin e fatkeqësive natyrore, me përmirësimin e flotës dhe fuqizimin e burimeve njerëzore të emergjencave civile,
Ministri Ahmetaj ka falenderuar kryeministrin italian Conte, ministrin e Jashtëm Di Maio dhe ambasadorin Bucci për vënien në dispozicion të 95 milionë eurove.
