Në shpërthimet që goditën të paktën 8,000 ndërtesa, 640 ishin historike
Shpërthimet në 4 gusht në Beirut shkaktuan qindra vdekje, mijëra të plagosur por gjithashtu shkaktuan plagë shkatërruese në trashëgiminë kulturore të qytetit. U shkatërruan disa nga lagjet më të vjetra të Bejrutit dhe u dëmtuan rëndë muzetë, galeritë e artit dhe vendet fetare.
Për këtë arsye, Unesco ka zbritur në terren që të marrë përsipër koordinimin, restaurimin dhe rindërtimin e vendeve kulturore. Vlerësimi i parë i dëmit të shkaktuar nga shpërthimet gjigante u bë nga Sarkis Khoury, drejtori i përgjithshëm i antikiteteve në Ministrinë e Kulturës së Libanit. Ai zbuloi se të paktën 8,000 ndërtesa u prekën, shumë prej të cilave janë përqendruar në rrethinat e vjetra të Gemayzé dhe Mar-Mikhael. Rreth 640 janë ndërtesa historike, rreth 60-të prej të cilave janë në rrezik shembjeje.
Drejtori foli gjithashtu për ndikimin e shpërthimit në muzetë e mëdha, të tilla si Muzeu Kombëtar i Bejrutit, Muzeu Sursock dhe Muzeu Arkeologjik i Universitetit Amerikan të Beirutit, si dhe në hapësirat kulturore, galeritë dhe vendet fetare.
Pas kërkesës për ndihmë nga Drejtoria e Përgjithshme për Antikitetet e Libanit, UNESCO ka marrë përsipër të udhëheqë mobilizimin ndërkombëtar për rimëkëmbjen dhe rindërtimin e kulturës dhe trashëgimisë së Bejrutit, bazuar në nevojat teknike të Drejtorisë së Përgjithshme dhe të Planit Ndërkombëtar të Veprimit për Kulturën në Bejrut.
Partnerët në këtë projekt përfshijnë Aleancën Ndërkombëtare për Mbrojtjen e Trashëgimisë në Zonat e Konflikteve, Qendrën Rajonale Arabe për Trashëgiminë Botërore, Blu Shield, Qendrën Ndërkombëtare për Studimin e Konservimit dhe Restaurimit të Pasurisë Kulturore dhe Këshillin Ndërkombëtar të Muzeve. UNESCO është e angazhuar të sigurojë që jeta e pasur kulturore dhe trashëgimia e Bejrutit të mund të vazhdojë të jetë një burim i forcës dhe rezistencës për popullin libanez./Bl.Ba/Fjala.al
