Edhe për trajnerin e bardhebluve, Emanuel Egbo, keqardhja është e madhe që Tirana e tij nuk arriti të vijonte më tej aventurën e saj të Ligës së Kampioneve, për më tepër duke shkëlqyer përballë një kundërshtari më të vlerësuar financiarisht si Crvena Zvezda.
“Sigurisht që më vjen keq, për më tepër, kur luan ashtu siç luajtëm në këtë takim, përkundër asaj loje që bëmë në Tbilisi, – ka deklaruar nigeriani i stolit të kryeqytetasve.
“Ajo që më ngroh është se, nga ndeshja në ndeshje, skuadra ka fituar besimin në vetvete dhe është rritur në lojën e saj dhe kjo u pa edhe nga fakti se, deri në sekondat e fundit të ndeshjes me Crvena Zvezdën, lojtarët e mia e kërkuan dhe punuan për ta gjetur golin, – ka vijuar ai. – Duhet të mbajmë parasysh se po funksionojmë në gjendje emergjence, për shkak të rrethanave, dhe alternativat i kishim të kufizuara në stol.”
“Por ja që nuk qe e thënë dhe ne tanimë do të përqendrohemi tek Liga e Evropës dhe unë jam besimplotë, se, edhe me ndihmën e Zotit, ne mund të vazhdojmë aventurën tonë edhe në këtë veprimtari”, – ka theksuar 47-vjeçari. – Me përforcimet që presim të na vijnë, por edhe me formën në rritje të skuadrës, që është rritur krahas besimit në vetvete, unë kam besim se mund të shkojmë larg”, – ka përfunduar trajneri i Tiranës, Emanuel Egbo./Bl.Ba/Fjala.al
