Presidenti i Federatës Shqiptare të Futbollit, Armand Duka menjëherë pas ndeshjes Tirana-Crvena Zvezda 0-1, ka bërë një reagim në rrjetet sociale.
Kreu i organizimit që qeveris futbollin shqiptar ka përgëzuar kampionen e Shqipërisë për paraqitjen në sfidën e Ligës së Kampioneve, të luajtur të martë në mbrëmjë në Stadiumin “Arena Kombëtare”.
Pavarësisht humbjes që solli eliminimin e ekipit shqiptar nga kjo veprimtari, presidenti Duka u kërkon bardhebluve të shohin përpara dhe të vazhdojnë rrugën e nisur në veprimtarinë tjetër evropiane, Ligën e Evropës.
“Tirana, skuadra që nderoi futbollin shqiptar dhe luajti me dinjitet deri në çastet e fundit u largua nga UEFA Champions League. Ky përfaqësim dinjitoz i kampionëve të Shqipërisë, pavarësisht dëshirave dhe shanseve deri në çastet e fundit nuk u kurorëzua me kualifikim. Por kjo nuk duhet ta zhgënjejë familjen bardheblu.
Forca Tirana! Europa League është një tjetër mundësi. Një tjetër mundësi! Sfida europiane vazhdon!”- shkruan presidenti Duka në rrjetet sociale.
