Ngjarja tronditëse e vitit 2012-të ka filluar të marrë dritë nga detaje të reja të zbardhura një ditë më parë.
Eglantina Buci u vra në 2012-ën nga babai dhe vëllai i saj Faik dhe Shkëlzen Buci, pasi është marrë me forcë dhe nën kërcënimin e armës në zonën e Freskut dhe më pas është ekzekutuar në Malin me Gropa.
Detajet nga dosja e 23-vjeçares thonë se krimi ishte planifikuar nga babai i saj Faiku, ndërsa i vëllai ka bërë ekzekutimin.
Pas krimit at e bir janë larguar nga vendngjarja duke lënë trupin e pajetë aty ku ndodhi akti makabër, për tu rikthyer 4 ditë më vonë dhe për ta varrosur 500 metra më larg.
Ky veprim është bërë nga frika se trupi i pajetë i vajzës mund të gjendej nga banorët e zones.
Pas një muaji, ka qënë një gjuetar i cili ka gjetur pjesë eshtrash të 23-vjeçares, të cilat ishin nxjerrë nga kafshët e egra.
Nisur nga eshtrat e sekuestruara dyshohet se viktima është ekzekutuar me një plumb në kokë, që përshkon nofullën e majtë dhe del në pjesën e pasme të kafkës.
Gjatë mbrëmjes së kaluar, janë thirrur në polici rreth 8 familjarë dhe të afërm të vajzës, të cilët janë pyetur nëse kanë pasur dijeni mbi ngjarjen e ndodhur më 2012-ën.
Të gjithë familjarët, përfshi edhe nënën e viktimës, kanë thënë se nuk kanë pasur dijeni për vendndodhjen e vajzës, që prej vitit 2012. /Ra.My.Fjala.al/
