Kryeministri i sotëm Edi Rama ka qenë dhe vijon të mbetet një ndër politikanët shqiptarë më aktivë në intervistat televizive, por jo vetëm. Që nga emërimi i tij si Ministër i Kulturës, Rinisë dhe Sporteve në vitin 1998, post që e mbajti deri në vitin 2000 nisën edhe intervistat e tij të para.
Për tu kthyer pak pas në kohë, ditën e sotme Anila Jole, gazetare në vitin 2002 në Televizionin “Koha” por që aktualisht mban postin e kryeredaktores në televizionin informativ “News24”, ka postuar në rrjete sociale një fotografi.
Në të shfaqen tre gazetarët e mirënjohur, i ndjeri Teodor Keko, Aleksandër Çipa dhe Anila Jole teksa intervistojnë Edi Ramën, asokohe kryetar i Bashkisë së Tiranës.
“Ndër të paktat dëshmi me foto të punës në TV Koha. Me të ndjerin Teodor Keko dhe Aleksandër Çipën intervistojmë Edi Ramën. Tiranë 2002”, shkruan Jole.
Në Tetor 2000, Partia Socialiste e Shqipërisë miratoi Edi Ramën në zgjedhjet për Kryetar të Bashkisë së Tiranës. Rama fitoi 57% të votave dhe u betua si kryebashkiak. /Er.Ke/Fjala.al/
