Një djalë i ri është kapur me dhjetëra doza lëndë narkotike gati për tu shpërndarë, gjatë operacionit të koduar “Lapraka”, pas “spiunimit” nga dy klientë.
Bazuar në informacionet e siguruara në rrugë policore, efektivët e policisë Tiranë bënë arrestimin e O. N., 24 vjeç, lindur në Gjermani dhe banues në Tiranë, poseduesi i lëndës narkotike.
Po në kuadër të operacionit u proceduan në gjendje të lirë shtetasit R. L., dhe E. Sh.
Hetuesit morën informacion se 24-vjeçari O. N., merrej me shpërndarje të lëndës narkotike të llojit kanabis në zonën e Laprakës, Tiranë, të cilën ia shiste shtetasve të ndryshëm.
Mbi bazën e këtyre informacioneve dhe kontrollet në zonën e Laprakës, u konstatuan shtetasit R. L., dhe E. Sh., të cilëve gjatë kontrollit fizik të ushtruar, iu është gjetur dhe sekuestruar një sasi lënde e dyshuar kanabis sativa.
Gjatë marrjes në pyetje, të dyshuarit janë shprehur se ja shiste një person i cili po qëndronte në një ndërtesë dykatëshe të pabanuar, i identifikuar më vonë nga policia si O. N.
Në vijim të kontrolleve në zonën përreth është konstatuar 24-vjeçari. Gjatë kontrollit të zonës ku qëndronte, policia gjeti dhe sekuestroi 169.4 gramë lëndë të dyshuar kanabis e ndarë në doza gati për shitje si dhe 3 aparate celular.
Ndaj tij hetimet janë në vijim, ndërkohë që materialet iu referuan Prokurorisë Tiranë, për veprime të mëtejshme hetimore./Bl.Ba/Fjala.al
